அஸ்வெசும திட்டம் இரட்டைப் பணம் சர்ச்சை ; நலன்புரி நன்மைகள் சபை விளக்கம்

அஸ்வெசும (Aswesuma) திட்டத்தின் கீழ் ஏப்ரல் மாதத்திற்கான கொடுப்பனவுகள் இருமுறை வழங்கப்பட்டதாகப் பரவி வரும் தகவல்கள் தொடர்பில் நலன்புரி நன்மைகள் சபை விளக்கமளித்துள்ளது.

தென்னிலங்கையில் தொடரும் இணைய நிதி மோசடி ; மீண்டும் சிக்கிய வெளிநாட்டு கும்பல்

தமிழ் மற்றும் சிங்கள புத்தாண்டுக்கு முன்னதாக அஸ்வெசும பயனாளிகளுக்கு ஏப்ரல் மாதக் கொடுப்பனவுகளை வழங்குவதே சபையின் நோக்கமாக இருந்தது. இதற்கமைய, முதலாம் மற்றும் இரண்டாம் கட்டப் பயனாளிகளுக்கான கொடுப்பனவு 2026.04.10 அன்று வழங்கப்பட்டது.

சாதாரண கொடுப்பனவுகளுக்கு மேலதிகமாக, மத்திய கிழக்கின் போர்ச் சூழலால் பாதிக்கப்பட்ட மக்களுக்கு நிவாரணம் வழங்கும் நோக்கில் பின்வரும் விசேட புத்தாண்டு கொடுப்பனவுகளை வழங்கத் தீர்மானிக்கப்பட்டிருந்தது.

மிகவும் வறிய குடும்பங்களுக்கு - 7,500 ரூபாய். வறிய குடும்பங்களுக்கு - 5,000 ரூபாய்.

பாதிப்புக்குள்ளாகக்கூடிய நிலையிலுள்ள குடும்பங்களுக்கு - 2,500 ரூபாய். ஒருங்கிணைந்த நலன்புரி நன்மைகள் தகவல் அமைப்பின் ஊடாக மாதத்திற்கு இருமுறை கொடுப்பனவுகளைச் செலுத்த இயலாது என்பதால், இந்த விசேட புத்தாண்டு நிவாரணக் கொடுப்பனவை கணினி முறைமைக்கு வெளியகமான (Manual Slip files) முறையில் வழங்கச் சபை நடவடிக்கை எடுத்தது.

இதன்போது, சுமார் 17 இலட்சம் குடும்பங்களுக்கான ஆவணங்கள் தயாரிக்கப்பட்டு, 90,000 கோப்புகளைக் கொண்ட தொகுதிகளாக (SLIP files) இலங்கை வங்கிக்கு அனுப்பப்பட்டன.

அங்கு ஏற்பட்ட ஒரு தவறு காரணமாக, ஒரு கோப்பு (Slip file) இருமுறை தரவேற்றப்பட்டது. இதன் காரணமாக வறிய குடும்பங்கள் பிரிவைச் சேர்ந்த சிலருக்கு இரட்டைக் கொடுப்பனவு (Double Payment) வழங்கப்பட்டமை கண்டறியப்பட்டது.

உடனடியாகச் செயற்பட்ட நலன்புரி நன்மைகள் சபை, குறித்த கொடுப்பனவுகளை இடைநிறுத்தியதுடன், மேலதிகமாகச் செலுத்தப்பட்ட தொகையை மீண்டும் சபையின் வங்கி கணக்கில் வைப்பிலிடுமாறு வங்கிகளுக்கு அறிவுறுத்தியது.

இருப்பினும், இந்தத் தடையுத்தரவு பிறப்பிக்கப்படுவதற்கு முன்னதாக 49,759 பயனாளிகள் தமது கணக்குகளில் இருந்து பணத்தை மீளப் பெற்றுள்ளனர்.

இவ்வாறு மேலதிகமாகப் பெறப்பட்ட 248,795,000 ரூபாய் தொகையை, அவர்களின் மே மாத அஸ்வெசும கொடுப்பனவில் இருந்து மீளப் பெற்றுக்கொள்ளத் திட்டமிடப்பட்டுள்ளது.

இந்தத் தவறு காரணமாக அரசாங்கத்திற்கு எவ்வித நிதி இழப்போ அல்லது முறைகேடோ ஏற்படவில்லை என நலன்புரி நன்மைகள் சபை சுட்டிக்காட்டியுள்ளது.

அவசரத் தேவை கருதி கணினி முறைமைக்கு வெளியகமான முறையில் கொடுப்பனவுகளை மேற்கொண்டமையே இதற்குப் பிரதான காரணம் எனத் தெரிவித்துள்ள சபை, மேலதிகப் பணத்தை மீளப் பெறும் நடவடிக்கைகள் துரிதமாக முன்னெடுக்கப்பட்டுள்ளதாகவும் குறிப்பிட்டுள்ளது.

யாழ் செம்மணியில் நான்கு குழந்தைகளின் என்பு கூடுகள் அடையாளம்