16 வயதில் உலகை வியக்க வைத்த இளம் நட்சத்திரம் லாமின் யமால்

உலகக் கால்பந்து அரங்கில் மிகக் குறைந்த வயதிலேயே தனது திறமையால் தனி முத்திரை பதித்துள்ள வீரராக லாமின் யமால் தற்போது உலக ரசிகர்களின் கவனத்தை ஈர்த்துள்ளார்.

உலகக் கோப்பை வெற்றி கொண்டாட்டத்தில் 13 வயது சிறுவனுக்கு நேரந்த கதி

15 அல்லது 16 வயதில் பலர் கல்வி, நண்பர்கள் மற்றும் சாதாரண இளமை வாழ்க்கையில் கவனம் செலுத்திக் கொண்டிருந்த காலகட்டத்தில், லாமின் யமால் கால்பந்து வரலாற்றில் புதிய சாதனைகளைப் படைக்கத் தொடங்கினார்.

இன்று உலகின் முன்னணி கால்பந்து வீரர்களில் ஒருவராக பேசப்படும் யமால், தனது கோல் கொண்டாட்டத்தின் போது காட்டும் "304" என்ற குறியீட்டின் மூலம் தனது வேர்களையும் சொந்த ஊரையும் நினைவுகூர்ந்து வருகிறார்.

லாமின் யமால் 2007 ஆம் ஆண்டு ஜூலை 13 ஆம் திகதி ஸ்பெயினின் பார்சிலோனா அருகே உள்ள எஸ்புலுகஸ் டி லியோப்ரெகாட் நகரில் பிறந்தார். அவரது தந்தை முனீர் நஸ்ராவி மொராக்கோ நாட்டைச் சேர்ந்தவர். அவரது தாயார் ஷீலா எபானா ஈக்குவட்டோரியல் கினியாவைச் சேர்ந்தவர்.

புலம்பெயர் குடும்பத்தில் பிறந்த யமால், எளிமையான சூழலில் வளர்ந்தார். அவர் வளர்ந்த ரோகாபோண்டா பகுதி, பல்வேறு கலாச்சார மக்கள் வாழும் பகுதியாகும்.

அந்தப் பகுதியின் தபால் குறியீட்டின் இறுதி இலக்கங்களான "304" என்பதையே அவர் தனது வெற்றிக் கொண்டாட்டங்களில் பயன்படுத்தி வருகிறார்.

சிறுவயதிலிருந்தே கால்பந்தில் அதிக ஆர்வம் கொண்டிருந்த யமால், தெருக்கள் மற்றும் உள்ளூர் மைதானங்களில் தனது திறமையை வளர்த்துக் கொண்டார். நான்கு வயதில் CF La Torreta என்ற உள்ளூர் கால்பந்து கிளப்பில் இணைந்த அவர், தனது அபாரமான திறமையால் கவனம் பெற்றார்.

2014 ஆம் ஆண்டு, ஏழு வயதில், உலகப் புகழ்பெற்ற பார்சிலோனா கால்பந்து அகாடமியான லா மாசியாவில் இணைந்தார். அங்கு தனது திறமையை மேலும் மேம்படுத்திய அவர், தன்னை விட வயதில் மூத்த வீரர்களுடனும் விளையாடி முன்னேற்றம் கண்டார்.

2023 ஆம் ஆண்டு ஏப்ரல் 29 ஆம் திகதி, லாமின் யமால் பார்சிலோனா முதல் அணிக்காக அறிமுகமானார். அப்போது அவருக்கு 15 வயது, 9 மாதங்கள், 16 நாட்கள் மட்டுமே. இதன் மூலம் பார்சிலோனா அணியின் வரலாற்றில் மிக இளம் வயதில் களமிறங்கிய வீரர்களில் ஒருவராக அவர் சாதனை படைத்தார்.

அதன் பின்னர் லா லிகா தொடரில் இளம் வயது கோல் அடித்த வீரர் மற்றும் உதவி வழங்கிய வீரர் உள்ளிட்ட பல சாதனைகளை அவர் படைத்தார்.

தனது வேகம், பந்தைக் கட்டுப்படுத்தும் திறன், துல்லியமான பாஸ்கள் மற்றும் கோல் உருவாக்கும் திறன் ஆகியவற்றின் மூலம் உலகின் சிறந்த இளம் வீரர்களில் ஒருவராக உருவெடுத்தார்.

ஸ்பெயின் தேசிய அணிக்காக விளையாடத் தீர்மானித்த லாமின் யமால், 2024 ஆம் ஆண்டு நடைபெற்ற யூரோ கிண்ணத் தொடரில் தனது திறமையை உலகிற்கு நிரூபித்தார்.

16 வயதில் களமிறங்கிய அவர், யூரோ வரலாற்றில் கோல் அடித்த மிக இளம் வீரர் என்ற சாதனையைப் படைத்தார். பிரான்ஸ் அணிக்கு எதிரான அரையிறுதிப் போட்டியில் அவர் அடித்த அற்புதமான கோல் உலக ரசிகர்களின் பாராட்டைப் பெற்றது.

ஸ்பெயின் அணி யூரோ கிண்ணத்தை வெல்லும் பயணத்தில் முக்கிய பங்காற்றிய யமால், தொடரின் சிறந்த இளம் வீரர் விருதையும் பெற்றார். 

லாமின் யமாலின் வாழ்க்கையில் அதிகம் பேசப்பட்ட மற்றொரு சம்பவம், கால்பந்து ஜாம்பவான் லியோனல் மெஸ்ஸியுடன் தொடர்புடைய பழைய புகைப்படமாகும்.

2007 ஆம் ஆண்டு நடைபெற்ற ஒரு தொண்டு நிறுவனத்தின் புகைப்பட நிகழ்வில், சில மாத குழந்தையாக இருந்த யமாலுடன் மெஸ்ஸி இடம்பெற்றிருந்தார். பல ஆண்டுகளுக்குப் பின்னர் அந்தப் புகைப்படம் சமூக வலைதளங்களில் வைரலாகி, ரசிகர்களிடையே பெரும் வரவேற்பைப் பெற்றது. 

எளிய குடும்ப பின்னணியில் இருந்து கடின உழைப்பின் மூலம் உலக கால்பந்தின் உச்சத்தை நோக்கி பயணித்து வரும் லாமின் யமால், இளம் தலைமுறை வீரர்களுக்கு ஒரு முன்னுதாரணமாக மாறியுள்ளார்.

வயது குறைந்தாலும் சாதனைகள் மிகப்பெரியது என்பதை நிரூபித்துள்ள அவர், எதிர்காலத்தில் உலகக் கால்பந்தின் மிகப் பெரிய நட்சத்திரங்களில் ஒருவராக உருவெடுப்பார் என ரசிகர்கள் எதிர்பார்க்கின்றனர்.

யாழ் - கண்டி பிரதான வீதியில் பேருந்து, லொறி மோதி விபத்து ; பேருந்து சாரதி வைத்தியசாலையில்