12 வயதில் அகதியாக ஜேர்மனி சென்று 20 அங்காடிகளுக்குச் சொந்தக்காரரான ஈழத் தமிழர்

Tamils London Sri Lanka Germany

By Sahana Nov 08, 2026 11:27 PM GMT

Sahana

Report

இலங்கையில் பிறந்து, தனது 12ஆவது வயதில் அகதியாக ஜேர்மனிக்குச் சென்ற ஈழத் தமிழர் ஒருவர், இன்று பிரித்தானியாவின் சில்லறை வணிகத் துறையில் குறிப்பிடத்தக்க சாதனையைப் படைத்துள்ளார்.

தொழிலதிபர் ஜெயசீலன் தம்பிராஜா, பிரித்தானியாவில் வழங்கப்படும் ‘Asian Trader of the Year 2025’ விருதை வென்று அங்கீகாரம் பெற்றுள்ளார்.

1976ஆம் ஆண்டு பிறந்த ஜெயசீலன் தம்பிராஜா, இலங்கையில் நிலவிய போர்ச் சூழல் காரணமாக தனது பெற்றோரிடமிருந்து பிரிந்து, 12 வயதில் தனியாக ஜேர்மனிக்குச் சென்றுள்ளார்.

12 வயதில் அகதியாக ஜேர்மனி சென்று 20 அங்காடிகளுக்குச் சொந்தக்காரரான ஈழத் தமிழர் | Eelam Tamil Germany Refugee Owns 20 Retail Stores

அங்கு கல்வி கற்ற அவர், 2000ஆம் ஆண்டு மேலதிகக் கல்வியைத் தொடர்வதற்காகப் பிரித்தானியாவுக்குச் சென்றார்.

லண்டனின் பேர்ன்ட் ஓக் பகுதியில் அமைந்திருந்த சிறிய அங்காடி ஒன்றில் பகுதி நேரப் பணியாளராகத் தனது வாழ்க்கைப் பயணத்தைத் தொடங்கிய அவர், கல்வியை நிறைவு செய்த பின்னர் அதே அங்காடியைக் கொள்வனவு செய்து தனது சொந்த வணிகத்தை ஆரம்பித்தார்.

ஒரு சிறிய அங்காடியில் தொடங்கிய அவரது வணிக முயற்சி, இன்று 20 அங்காடிகளைக் கொண்ட பெரிய வணிகக் குழுமமாக வளர்ச்சியடைந்துள்ளது.

MSP & Noble Group நிறுவனத்தின் கீழ் இயங்கும் இந்த அங்காடிகளில் 180 இற்கும் மேற்பட்டோர் பணியாற்றுகின்றனர்.

பழைய உணவகங்கள், தீயணைப்பு நிலையங்கள் மற்றும் வாகனக் காட்சியகங்கள் போன்ற கட்டிடங்களை நவீன அங்காடிகளாக மாற்றி வணிக நடவடிக்கைகளை முன்னெடுப்பது அவரது தனித்துவமான வணிக அணுகுமுறையாகக் குறிப்பிடப்படுகிறது.

12 வயதில் அகதியாகப் புலம்பெயர்ந்து, சிறிய அங்காடி ஒன்றில் பணியாளராகத் தொடங்கிய அவரது பயணம், இன்று 20 அங்காடிகளைக் கொண்ட வணிகக் குழுமத்தின் உரிமையாளராகவும் சர்வதேச அளவிலான அங்கீகாரத்தைப் பெற்ற தொழிலதிபராகவும் உயர்ந்துள்ளமை பலரது கவனத்தையும் ஈர்த்துள்ளது.