கடலில் தத்தளித்த 25 இந்தோனேசிய கடற்றொழிலாளர்களுக்கு இலங்கை கடற்படை உதவி

Port of Colombo Sri Lanka Australia Sri Lanka Navy

By Sahana Sep 25, 2026 04:05 AM GMT

Sahana

Report

அவுஸ்திரேலியாவின் தேடல் மற்றும் மீட்பு வலயத்தில் கடலில் தத்தளித்த 25 இந்தோனேசிய கடற்றொழிலாளர்கள் இலங்கை கடற்படையினரால் பாதுகாப்பாக மீட்கப்பட்டு கொழும்பு துறைமுகத்திற்கு அழைத்து வரப்பட்டுள்ளனர்.

பல தரப்பினரின் ஒருங்கிணைப்புடன் முன்னெடுக்கப்பட்ட மீட்பு நடவடிக்கையின் பின்னர், குறித்த கடற்றொழிலாளர்கள் பாதுகாப்பாக கரைக்கு அழைத்து வரப்பட்டதாக இலங்கை கடற்படை தெரிவித்துள்ளது.

கடலில் தத்தளித்த 25 இந்தோனேசிய கடற்றொழிலாளர்களுக்கு இலங்கை கடற்படை உதவி | Sri Lanka Navy Assists 25 Indonesian Fishermen

KM Garuda Jaya VI என்ற இந்தோனேசிய மீன்பிடி இழுவைப் படகு கடந்த செப்டெம்பர் 22ஆம் திகதி இலங்கைக்கு தெற்கே கடற்பரப்பில் கவிழ்ந்ததாக தெரிவிக்கப்பட்டுள்ளது.

இந்த சம்பவம் அவுஸ்திரேலியாவின் தேடல் மற்றும் மீட்பு வலயத்திற்குள் இடம்பெற்ற நிலையில், படகில் இருந்த கடற்றொழிலாளர்கள் ஆபத்தில் சிக்கியுள்ளதாக ஆரம்பத்தில் தகவல் கிடைத்துள்ளது.

இதனையடுத்து, சம்பவம் தொடர்பில் தகவல் கிடைத்ததைத் தொடர்ந்து, MV Moonstone என்ற வர்த்தகக் கப்பல் சம்பவ இடத்திற்குச் சென்று கடலில் தத்தளித்துக் கொண்டிருந்த 25 கடற்றொழிலாளர்களையும் பாதுகாப்பாக மீட்டுள்ளது.

மீட்பு நடவடிக்கை தொடர்பில் கொழும்பு கடல்சார் மீட்பு ஒருங்கிணைப்பு நிலையத்திற்கு (MRCC) தகவல் வழங்கப்பட்டதைத் தொடர்ந்து, MRCC கொழும்பின் ஒருங்கிணைப்புடன் இலங்கை கடற்படையின் இரண்டு படகுகள் அனுப்பி வைக்கப்பட்டுள்ளன.

இதன்போது, MV Moonstone கப்பலில் பாதுகாப்பாக வைக்கப்பட்டிருந்த 25 இந்தோனேசிய கடற்றொழிலாளர்களும் இலங்கை கடற்படை படகுகள் மூலம் கொழும்பு துறைமுகத்திற்கு அழைத்து வரப்பட்டுள்ளனர்.

மீட்கப்பட்ட கடற்றொழிலாளர்களுக்கு இலங்கை கடற்படையினரால் தேவையான மனிதாபிமான உதவிகள் வழங்கப்பட்டதாகவும் தெரிவிக்கப்பட்டுள்ளது.

பின்னர், குறித்த 25 பேரும் மேலதிக நடவடிக்கைகளுக்காக இலங்கையிலுள்ள இந்தோனேசிய தூதரக அதிகாரிகளிடம் ஒப்படைக்கப்பட்டுள்ளனர்.

இந்த மீட்பு நடவடிக்கை, கடலில் ஆபத்தில் சிக்கிய வெளிநாட்டு கடற்றொழிலாளர்களுக்கு வழங்கப்பட்ட ஒருங்கிணைந்த மனிதாபிமான உதவியாக அமைந்துள்ளதாக இலங்கை கடற்படை தெரிவித்துள்ளது.