லங்காசிறி FM
22 வது திருத்தம், நீதித்துறை திருத்த சட்டமூலங்கள் ; இன்று நாடாளுமன்றத்தில் வாக்கெடுப்பு
அரசமைப்பின் 22ஆவது திருத்தச் சட்டமூலம் மற்றும் நீதித்துறை திருத்தச் சட்டமூலம் தொடர்பான இரண்டாம் வாசிப்பு விவாதம் இன்று நாடாளுமன்றத்தில் இரண்டாவது நாளாக தொடர்கிறது.
இன்று காலை 11.30 மணி முதல் இரவு 7 மணி வரை விவாதம் நடைபெறவுள்ளதுடன், விவாதம் நிறைவடைந்த பின்னர் இரு சட்டமூலங்கள் மீதும் வாக்கெடுப்பு நடத்தப்படவுள்ளது.
22ஆவது அரசமைப்புத் திருத்தச் சட்டமூலம், உயர் நீதிமன்ற நீதிபதிகளின் ஓய்வுபெறும் வயது தொடர்பான ஏற்பாடுகளை மாற்ற முன்மொழிகிறது.
இதன்படி, உச்ச நீதிமன்ற நீதிபதிகளின் ஓய்வுபெறும் வயதை 65 இலிருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வுபெறும் வயதை 63 இலிருந்து 65 ஆகவும் அதிகரிக்க முன்மொழியப்பட்டுள்ளது.
அத்துடன், உயர் நீதிமன்ற நீதிபதிகளின் எண்ணிக்கையை 110 இலிருந்து 120 ஆகவும், மேன்முறையீட்டு நீதிமன்ற நீதிபதிகளின் எண்ணிக்கையை 19 இலிருந்து 24 ஆகவும் அதிகரிக்க முன்மொழியப்பட்டுள்ளது.
நீதித்துறை திருத்தச் சட்டமூலம், உயர் நீதிமன்றம், நீதவான் நீதிமன்றம் உள்ளிட்ட ஏனைய நீதிமன்றங்களின் நீதிபதிகளின் ஓய்வுபெறும் வயது தொடர்பான மாற்றங்களை முன்மொழிகிறது.
இந்த இரண்டு சட்டமூலங்களும் கடந்த ஆகஸ்ட் 18ஆம் திகதி நாடாளுமன்றத்தில் முதலாம் வாசிப்புக்காக சமர்ப்பிக்கப்பட்டிருந்தன.
இரு சட்டமூலங்களின் அரசமைப்புத் தன்மை தொடர்பில் உயர்நீதிமன்றம் வழங்கிய தீர்மானத்தை சபாநாயகர் கடந்த செப்டெம்பர் 22ஆம் திகதி நாடாளுமன்றத்திற்கு அறிவித்தார்.
22ஆவது திருத்தச் சட்டமூலத்தை நிறைவேற்ற மக்கள் வாக்கெடுப்பு தேவையில்லை என உயர்நீதிமன்றம் தீர்மானித்துள்ளது.
அதேவேளை, நீதித்துறை திருத்தச் சட்டமூலம் அரசமைப்புக்கு முரணானதல்ல என்பதுடன், அதனை நாடாளுமன்றத்தில் சாதாரண பெரும்பான்மையுடன் நிறைவேற்ற முடியும் எனவும் நீதிமன்றம் தீர்மானித்துள்ளது.
வறுத்தலைவிளான், யாழ்ப்பாணம், கோண்டாவில், கொழும்பு, அநுராதபுரம்
25 Sep, 2022
யாழ்ப்பாணம், வவுனியா, கனடா, Canada, Montreal, Canada
31 Aug, 2015
