லங்காசிறி FM
ஜனாதிபதியின் கருத்துக்கு இலங்கை சட்டத்தரணிகள் சங்கம் கவலை
அண்மையில் நடைபெற்ற மே தினக் கூட்டத்தில் ஜனாதிபதி அனுர குமார திசாநாயக்க தெரிவித்த கருத்துக்கள், நீதித்துறையின் மீதுள்ள பொதுமக்களின் நம்பிக்கையைக் குலைக்கும் வகையில் அமைந்துள்ளதாக இலங்கை சட்டத்தரணிகள் சங்கம் ஆழ்ந்த கவலை தெரிவித்துள்ளது.
அந்த சங்கத்தின் தலைவர் ராஜீவ் அமரசூரிய மற்றும் செயலாளர் நளின் டி சில்வா ஆகியோரின் கையெழுத்துடன் வெளியிடப்பட்ட அறிக்கையில்,
இந்த விடயம் தெரிவிக்கப்பட்டுள்ளதுடன், எதிர்வரும் மே 25 ஆம் திகதியன்று வெளியாகவுள்ள நீதிமன்றத் தீர்ப்பு குறித்து ஜனாதிபதி பேசிய விதம் சுட்டிக்காட்டப்பட்டுள்ளது.
குறிப்பாக, தீர்ப்பு வெளியாகும் போது ஆதரவாளர்கள் அதனைப் பாராட்டி கைதட்டலாம் என்று ஜனாதிபதி கூறிய கருத்து, நீதித்துறைச் செயல்பாட்டில் தலையீடு செய்வதற்கான வாய்ப்பை ஏற்படுத்துவதாகச் சங்கம் எச்சரித்துள்ளது.
ஜனநாயக சமூகத்தில் சுயாதீனமான நீதித்துறையின் முக்கியத்துவத்தை வலியுறுத்தியுள்ள அந்த சங்கம், சட்டத்தின் ஆட்சியானது நீதிபதிகள் எவ்வித அச்சமும் தலையீடும் இன்றிச் செயல்படும் திறனைப் பொறுத்தே அமைகிறது என்று தெரிவித்துள்ளது.
மேலும், நீதித்துறை சுதந்திரம் என்பது வெறும் நிறுவன ரீதியான பாதுகாப்பு மட்டுமல்லாமல், ஜனநாயகத்தின் அடித்தளம் மற்றும் தனிமனித கண்ணியத்தைப் பேணக்கூடிய அடிப்படைத் தூண் என்றும் குறிப்பிட்டுள்ளது.
அரசியலமைப்புச் சட்டத்தின் விதிகளையும் சுட்டிக்காட்டியுள்ள சங்கம், நாட்டின் பாரம்பரியமான நீதித்துறை சுதந்திரத்தைப் பேணிக் காப்பதாக உறுதிப்படுத்தும் அரசியலமைப்பு முன்னுரையை நினைவுகூர்ந்துள்ளது.
அத்துடன், நீதித்துறை அதிகாரங்களைக் கொண்ட எவரும் வெளிநபர்களின் தலையீடு இன்றிக் கடமைகளைச் செய்ய வேண்டும் என்று வலியுறுத்தும் பிரிவு 111C(1) மற்றும் அவ்வாறான தலையீடுகளைக் குற்றமாகக் கருதும் பிரிவு 111C(2) ஆகியவற்றைச் சங்கம் மேற்கோள் காட்டியுள்ளது.
செயற்குழு உட்பட எந்தவொரு தரப்பிலிருந்தும் நீதித்துறைக்கு எதிராக வரக்கூடிய அச்சுறுத்தல்களைத் தொடர்ந்து எதிர்த்து வருவதாகக் கூறியுள்ள இலங்கை சட்டத்தரணிகள் சங்கம், ஜனநாயகத்தைப் பாதுகாக்கவும், சட்டத்தின் ஆட்சியை நிலைநாட்டவும், அரசியலமைப்பைப் பேணவும் தேவையான அனைத்து நடவடிக்கைகளையும் தொடர்ந்து முன்னெடுப்போம் என்று உறுதி அளித்துள்ளது.
புங்குடுதீவு 8ம் வட்டாரம், கொழும்பு, முல்லைத்தீவு, Den Helder, Netherlands
10 May, 2020
