லங்காசிறி FM
நீதிமன்ற விசாரணைகள் பகிரங்கம் ; அமைச்சர் விளக்கம்
அமைச்சரவை முடிவுகளை அறிவிக்கும் செய்தியாளர் சந்திப்பில் கலந்து கொண்ட அமைச்சரவைப் பேச்சாளர் நளிந்த ஜயதிஸ்ஸவிடம், வரவிருக்கும் நீதிமன்றத் தீர்ப்புகள் குறித்து ஜனாதிபதி முன்கூட்டியே அறிந்திருப்பது நீதிமன்றச் சுதந்திரத்தைப் பாதிக்குமா என ஊடகவியலாளர்கள் கேள்வி எழுப்பினர்.
இதற்குப் பதிலளித்த அமைச்சர், நீதிமன்ற வழக்குகள் மற்றும் தீர்ப்புகள் வழங்கப்படும் திகதிகள் என்பன பொதுத் தகவல்கள் (Public Knowledge) என்றும், ஊடகங்களும் இது குறித்து ஆர்வம் உள்ளவர்களும் இதனை எளிதாக அறிந்து கொள்ள முடியும் என்றும் தெரிவித்தார்.
நீதிமன்றத் திகதிகள் இரகசியமானவை அல்ல, அரச வைத்திய அதிகாரிகள் சங்கம் தாக்கல் செய்த வழக்கின் தீர்ப்பு இம்மாதம் 8ஆம் திகதி வருவது போன்ற தகவல்கள் பகிரங்கமானவை.
இதேபோல், விமல் வீரவங்ச, நாமல் ராஜபக்ஷ, ஜோன்ஸ்டன் பெர்னாண்டோ, ரவி கருணாநாயக்க உள்ளிட்ட பல அரசியல்வாதிகளின் வழக்குத் திகதிகளையும் ஊடகங்கள் மற்றும் பொதுமக்கள் அறிவர் என்று அவர் பல பெயர்களைப் பட்டியலிட்டார்.
சில சமயங்களில் நீதிமன்றத் திகதிகள் மாற்றமடையக்கூடும். உதாரணமாக, சரண குணவர்தனவின் வழக்கு ஏப்ரல் 30 ஆம் திகதிக்கு மாற்றப்பட்டதை அவர் சுட்டிக்காட்டினார்.
எதிர்வரும் 22, 25, 26 ஆகிய திகதிகளில் பல்வேறு வழக்குகள் விசாரணைக்கு வரவுள்ளதை எவரும் தெரிந்து வைத்திருக்க முடியும் என்றார்.
இதனையடுத்து, மே 25ஆம் திகதி நீதிமன்றத் தீர்ப்பு வரும்போது "கைதட்டுவதற்குத் தயாராக இருக்குமாறு" ஜனாதிபதி தனது ஆதரவாளர்களிடம் கூறியது குறித்து அமைச்சரிடம் கேட்கப்பட்டது.
அதற்குப் பதிலளித்த அவர், பகிரங்க நீதிமன்றத்தில் நடக்கும் விசாரணைகள் மற்றும் முன்வைக்கப்படும் சாட்சியங்களை அவதானிக்கும் எவருக்கும் வழக்கின் போக்கு குறித்து ஒரு பொதுவான புரிதல் ஏற்படும் என்று குறிப்பிட்டார்.
ஜனாதிபதியின் இத்தகைய கருத்துக்களால் நீதித்துறைக்கு எவ்வித அழுத்தமோ அல்லது தடையோ ஏற்படாது என அவர் வலியுறுத்தினார்.
சட்ட ரீதியான நடவடிக்கைகள் எவ்விதப் பாதிப்பும் இன்றித் தொடர்வதே முக்கியமானது என்றும் அவர் தெரிவித்தார்.
இந்த விளக்கத்தின் மூலம், நீதிமன்றத் தீர்ப்புகள் குறித்த ஜனாதிபதியின் கருத்துக்கள் தனிப்பட்ட தகவல்களை அடிப்படையாகக் கொண்டவை அல்ல என்றும், அவை நீதிமன்றச் சுதந்திரத்தைப் பாதிக்காது என்றும் அமைச்சர் நளிந்த ஜயதிஸ்ஸ உறுதிபடத் தெரிவித்தார்.
புங்குடுதீவு 8ம் வட்டாரம், கொழும்பு, முல்லைத்தீவு, Den Helder, Netherlands
10 May, 2020
