அக்குரேகொட இரட்டைக் கொலை சம்பவம் ; கைதான ராணுவ அதிகாரியின் திடுக்கிடும் தகவல்

கடந்த சில காலத்திற்கு முன்னர் அக்குரேகொட பகுதியில் சட்டத்தரணி ஒருவரும் அவரது மனைவியும் துப்பாக்கியால் சுட்டுக்கொலை செய்யப்பட்ட சம்பவம் பெரும் பரபரப்பை ஏற்படுத்தியிருந்தது.

தென்னாப்பிரிக்காவை வீழ்த்தி தொடரை வென்ற இந்தியா அணி

இந்தச் சம்பவம் தொடர்பாக நீண்டகாலமாகத் தேடப்பட்டு வந்த முக்கிய துப்பாக்கிதாரி, ஹோமாகம குற்றத்தடுப்புப் பிரிவினருக்குக் கிடைத்த இரகசியத் தகவலின் அடிப்படையில் அம்பலாங்கொட பகுதியில் வைத்து அண்மையில் கைது செய்யப்பட்டுள்ளார்.

கைது செய்யப்பட்ட நபர் ஒரு முன்னாள் இராணுவ அதிகாரி என்பதுடன் அவர் மேலதிக விசாரணைகளுக்காக மேல் மாகாண தெற்கு குற்ற விசாரணைப் பிரிவினரிடம் ஒப்படைக்கப்பட்டுள்ளார்.

இந்தக் கொலையின் பின்னணியில் வெளிநாட்டில் தலைமறைவாக இருக்கும் "கரந்தெனிய சுத்தா" என்பவரே மூளையாகச் செயற்பட்டுள்ளார் என்றும் கரந்தெனிய சுத்தவிற்கும் குறித்த சட்டத்தரணிக்கும் இடையே ஏற்பட்ட தனிப்பட்ட விரோதமே இந்தப் படுகொலைக்குக் காரணமாக அமைந்துள்ளது என்றும் விசாரணையில் தெரியவந்துள்ளது.

சந்தேகநபர் அளித்துள்ள வாக்குமூலத்தின்படி, "தன்னைப் பற்றிய இரகசியத் தகவல்கள் மற்றும் கடவுச்சீட்டு (Passport) விபரங்கள் குறித்த சட்டத்தரணியிடம் இருப்பதாகவும், அவர் அந்தத் தகவல்களை 'லொகு பெட்டி' என்பவரிடம் வழங்கி, தன்னை இலங்கைக்கு வரவழைக்க (நாடுகடத்த) முயற்சிப்பதாகவும்" கரந்தெனிய சுத்தா கருதியுள்ளார்.

இதன் காரணமாகவே, சட்டத்தரணியை மட்டுமல்லாது அவரது மனைவியையும் சேர்த்துக் கொல்லுமாறு அவர் துப்பாக்கிதாரிகளுக்குக் கட்டளையிட்டுள்ளார்.

மேலதிக விசாரணை

இந்தக் கொலையில் மிகவும் வியக்கத்தக்க விடயம் என்னவென்றால், துப்பாக்கிச் சூடு நடத்திய இருவர் மற்றும் அவர்களை வாகனத்தில் அழைத்துச் சென்ற சாரதி ஆகிய மூவரும் இதற்கு முன்னர் ஒருவரையொருவர் நேரில் சந்தித்ததே இல்லை. கொலைத் திட்டத்தை நிறைவேற்றுவதற்காகவே அவர்கள் முதன்முறையாகச் சந்தித்துள்ளனர்.

சம்பவத்திற்கு முந்தைய நாள், ஒரு துப்பாக்கிதாரி பன்னிபிட்டிய பகுதியிலுள்ள விடுதியொன்றிலும், மற்றையவர் மொரகெட்டிய பகுதியிலுள்ள விடுதியொன்றிலும் தங்கியிருந்தனர்.

பின்னர், சாரதி அவர்களைத் தனது வாகனத்தில் ஏற்றிக்கொண்டு அக்குரேகொட பகுதிக்கு அழைத்துச் சென்றுள்ளார்.

கொலைச் சம்பவத்திற்கு ஒரு நாளைக்கு முன்னதாக, கொட்டிக்காவத்தை பகுதியிலுள்ள ஒரு வீட்டில் வைத்து, கொலைக்கு பயன்படுத்தப்பட்ட T-56 மற்றும் ரிவோல்வர் ஆகிய ஆயுதங்களைச் சோதித்துப் பார்த்துள்ளனர்.

சட்டத்தரணியும் அவரது மனைவியும் சிறப்பங்காடிக்கு வரும் வரை காத்திருந்த கொலையாளிகள், அவர்கள் வந்தவுடன் துப்பாக்கிச் சூட்டை நடத்தியுள்ளனர்.

தாக்குதலுக்குப் பிறகு, கொலையாளிகள் கொட்டாவ பகுதிக்குச் சென்று அங்கிருந்து வெவ்வேறு திசைகளில் தப்பியோடியுள்ளனர்.

T-56 ரக துப்பாக்கியால் சுட்ட பிரதான சந்தேகநபர், பேருந்து மூலம் தெஹிவளைக்குச் சென்று, அங்கிருந்து காலி வீதி வழியாக அம்பலாங்கொடவை அடைந்துள்ளார்.

அங்குள்ள ஒரு கோழிப்பண்ணை மற்றும் கறுவாத் தோட்டம் ஒன்றில் காவலாளியாகப் பணியாற்றி வந்த நிலையில் கைதாகியுள்ளார்.

இவருக்குப் புகலிடம் அளித்த நபர் தற்போது தப்பியோடியுள்ள நிலையில், அவரது உந்துருளியை காவல்துறையினர் கைப்பற்றியுள்ளனர்.

தற்போது, கைதுசெய்யப்பட்டுள்ள முன்னாள் இராணுவ அதிகாரிக்கு, அவர் பணியில் இருந்த காலப்பகுதியில் கரந்தெனிய சுத்தாவின் அறிமுகம் கிடைத்துள்ளது.

கைது செய்யப்பட்ட முன்னாள் இராணுவச் அதிகாரி, முன்னதாக ஒரு குற்றத்திற்காக ஓராண்டு காலம் சிறையில் இருந்தபோது, அவரைப் பிணையில் எடுப்பதற்குத் தேவையான பணத்தை கரந்தெனிய சுத்தவே வழங்கியுள்ளார்.

அந்த உதவிக்கு நன்றிக் கடனாகவே இந்தக் கொலையைச் செய்ய அவர் சம்மதித்துள்ளார் என விசாரணைகளில் தெரியவந்துள்ளது.

இருப்பினும், இதற்காக அவருக்கு இரண்டு தவணைகளாக மொத்தம் 2.5 இலட்சம் ரூபா பணம் வழங்கப்பட்டுள்ளமையும் விசாரணையில் தெரியவந்துள்ளது.

தற்போது கைது செய்யப்பட்டுள்ள சந்தேகநபரின் தொலைபேசி தரவுகளை ஆய்வு செய்ததன் மூலமே அவர் இருக்கும் இடத்தை காவல்துறையினர் கண்டறிந்துள்ளனர்.

இந்தச் சம்பவம் தொடர்பான மேலதிக விசாரணைகளை மேல் மாகாண தெற்கு குற்ற விசாரணைப் பிரிவினர் தொடர்ந்து முன்னெடுத்து வருகின்றனர். 

பிரித்தானியாவில் அரசியல் அதிர்வு ; நாமல் உரைக்கு எதிராகப் போராட்டம்