காலி பெந்தோட்டை கடற்பரப்பில் பாடசாலை மாணவன் கடலில் மூழ்கி உயிரிழப்பு
காலி பெந்தோட்டை கடற்பரப்பில் நீராடிக்கொண்டிருந்த போது நீரில் மூழ்கிக் காணாமல் போயிருந்த 16 வயதுடைய பாடசாலை மாணவனின் சடலம், கடலோரப் பாதுகாப்பு அதிகாரிகளால் மீட்கப்பட்டுள்ளது.
பெந்தோட்டை இரண்டாம் இலக்க உயிர்காப்பு நிலையத்துக்கு இடதுபுறமாக சுமார் 500 மீற்றர் தொலைவிலும், கரையிலிருந்து சுமார் 200 மீற்றர் தூரத்திலும் ஐந்து இளைஞர்கள் இன்று (22) கடலில் நீராடிக்கொண்டிருந்த போதே இந்த சம்பவம் நேர்ந்துள்ளது.
நீராடிக்கொண்டிருந்த இளைஞர்கள் திடீரென நீரில் மூழ்கத் தொடங்கியதை அவதானித்த கடலோரப் பாதுகாப்பு அதிகாரிகள் மற்றும் பொலிஸ் உயிர்காப்புப் பிரிவினர் இணைந்து உடனடியாக மீட்பு நடவடிக்கையை முன்னெடுத்தனர்.

உயிர்காப்பு உபகரணங்களின் உதவியுடன் அவர்களில் நான்கு இளைஞர்கள் பாதுகாப்பாகக் கரைக்கு மீட்டு வரப்பட்ட போதிலும், 16 வயதுடைய மாணவன் நீரில் அடித்துச் செல்லப்பட்டுக் காணாமல் போயிருந்தார்.
அதனைத் தொடர்ந்து கடலோரப் பாதுகாப்புத் திணைக்கள அதிகாரிகள் முன்னெடுத்த தொடர்ச்சியான தேடுதல் நடவடிக்கையின் போது, குறித்த மாணவனின் சடலம் கண்டெடுக்கப்பட்டு மீட்கப்பட்டுள்ளது.
மீட்கப்பட்ட ஏனைய நான்கு இளைஞர்களும் 15, 16, 18 மற்றும் 20 வயதுடையவர்கள் என அடையாளம் காணப்பட்டுள்ளனர்.
அவர்கள் மேலதிக மருத்துவ சிகிச்சைகளுக்காகப் பெந்தோட்டை வைத்தியசாலையில் அனுமதிக்கப்பட்டுள்ளனர்.