கிழக்கு மாகாண ஆளுநர் செயலகத்தை முற்றுகையிட்டு ஆர்ப்பாட்டம்

Government Employee Eastern Province Protest

By Sulokshi Sep 21, 2026 10:31 AM GMT

Sulokshi

Report

இடமாற்ற கோரிக்கையை முன்வைத்து கிழக்கு மாகாண ஆளுநர் செயலகத்திற்கு முன்பாக வெளிமாவட்ட அபிவிருத்தி உத்தியோகத்தர்கள் இன்று திங்கட்கிழமை (21) காலை கவனயீர்ப்பு ஆர்ப்பாட்டத்தில் ஈடுபட்டிருந்தனர்.

மட்டக்களப்பு மற்றும் அம்பாறை மாவட்டங்களைச் சேர்ந்த அபிவிருத்தி உத்தியோகத்தர்கள் ஆர்ப்பாட்டத்தில் ஈடுபட்டனர்.

கிழக்கு மாகாண ஆளுநர் செயலகத்தை முற்றுகையிட்டு ஆர்ப்பாட்டம் | Protest And Siege Eastern Governor S Secretariat

5 வருடங்களாகியும் இடமாற்றம் வழங்கப்படவில்லை

2021, 2022 ஆம் ஆண்டுகளில் திருகோணமலை மாவட்டத்தில் உள்ள அலுவலகங்களில் அபிவிருத்தி உத்தியோகத்தர்களாக நியமனம் கிடைத்து 5 வருடங்களாகியும் தமக்கு இன்னும் சொந்த மாவட்டங்களுக்கு இடமாற்றம் வழங்கப்படவில்லையென ஆர்ப்பாட்டத்தில் ஈடுபட்டவர்கள் தெரிவித்தனர்.

2021, 2022 காலப்பகுதியில் அம்பாறை, மட்டக்களப்பு மாவட்டகளைச் சேர்ந்த சுமார் 500 பேருக்கு அபிவிருத்தி உத்தியோகத்தர்களாக நியமனம் வழங்கப்பட்டது.

தற்போது சுமார் 50 பேர் அளவிலே திருகோணமலையில் கடமை புரிகின்றோம். வாழ்க்கைச் செலவு அதிகரிப்பு, சம்பளப் பிரச்சினைகளுக்கு மத்தியில் உணவு, தங்குமிடம் மற்றும் போக்குவரத்திற்காக சம்பளத்தின் பெரும்பகுதியை செலவு செய்து பல கஷ்டங்களுக்கு மத்தியில் 5 வருடங்களாக பணியாற்றி வந்துள்ளோம்.

இதில் பெரும்பாலானவர்கள் 40 வயதுக்கு மேற்பட்டவர்கள் எனவும் இவர்களில் 95 வீதமானோர் திருமணமானவர்கள் எனவும் அவர்கள் குறிப்பிட்டுள்ளனர்.

இவ்வாறு தமக்கு பிரச்சினைகள் இருக்கும்போது தமது சொந்த மாவட்டங்களுக்கு இடமாற்றம் பெற்றுத் தருமாறு பல்வேறு தடவைகள் வலியுறுத்திய போதிலும் இன்னும் பலனளிக்கவில்லை.

இவ்வருடத்திற்கான இடமாற்ற பட்டியலில் தமது பெயர்கள் இடம்பெறவில்லை எனவும் கவலை தெரிவிக்கின்றனர்.

எனவே தங்களுடைய சேவையினையும், அர்ப்பணிப்பினையும் கருத்தில் கொண்டு 2027 ஆம் ஆண்டு இடமாற்றத்திற்கான பட்டியலில் தங்களை சொந்த மாவட்டங்களுக்கு இடமாற்றம் வழங்க மனிதாபிமான ரீதியாகவும் நடவடிக்கை எடுக்க வேண்டும் என சம்பந்தப்பட்ட அதிகாரிகளிடமும் அரசிடமும் கேட்டுக் கொள்வதாக வெளிமாவட்ட அபிவிருத்தி உத்தியோகத்தர்கள் கோரிக்கை விடுத்தனர்.