விலங்குகளைப் பாதுகாக்க இலங்கையில் புதிய சட்டப் புரட்சி

விலங்குகளை நேசித்தல், அவற்றின் பாதுகாப்பை உறுதி செய்தல் மற்றும் விலங்குகளுக்கு எதிரான கொடுமைகளைத் தடுக்கும் நோக்கில் இலங்கையின் சட்டக் கட்டமைப்பை மேலும் வலுப்படுத்தும் வகையில் புதிய விலங்கு நலச் சட்டமூலம் அரசாங்கத்தால் முன்மொழியப்பட்டுள்ளது.

இலங்கை சினிமாவுக்கு உலகப் பெருமை ; சர்வதேச விருதுகளை வென்ற நடிகர்களுக்கு உற்சாக வரவேற்பு

2026 ஜூலை 17ஆம் திகதியிட்ட அரசாங்க வர்த்தமானி அறிவித்தலில் வெளியிடப்பட்டுள்ள இந்தச் சட்டமூலத்தின் மூலம், விலங்குகள் மீது கருணை, தயவு மற்றும் பொறுப்புணர்வுடன் நடந்து கொள்வதுடன், அவற்றின் பாதுகாப்பு, நலன் மற்றும் நல்வாழ்வை உறுதிப்படுத்தும் புதிய சட்ட ஏற்பாடுகள் அறிமுகப்படுத்தப்படவுள்ளன.

உணவு, நீர் மற்றும் இருப்பிடத்தை மறுப்பதும் குற்றமாகும்

விலங்கு நலன் என்பது விலங்குகளை உடல்ரீதியாகத் தாக்காமல் இருப்பதுடன் மட்டுப்படுவதில்லை என்பதை இந்தச் சட்டமூலம் வலியுறுத்துகிறது. விலங்குகளுக்குத் தேவையான உணவு, சுத்தமான குடிநீர் மற்றும் பொருத்தமான இருப்பிடத்தை வழங்குவது உரிமையாளர்களின் அடிப்படைப் பொறுப்பாகக் கருதப்பட்டுள்ளது.

இதன்படி, விலங்குகளுக்கு உணவோ அல்லது நீரோ வழங்காமல் இருப்பது, அவற்றுக்குத் தகுந்த இருப்பிடத்தை வழங்கத் தவறுவது, அளவுக்கு அதிகமாக வேலை வாங்குவது, வேலை செய்யத் தகுதியற்ற விலங்குகளைப் பயன்படுத்துவது அல்லது வேறு எந்தச் செயல் அல்லது அலட்சியத்தின் மூலமும் தேவையற்ற வலி, துன்பம் அல்லது காயத்தை ஏற்படுத்துவது குற்றமாகப் பிரகடனப்படுத்தப்பட உள்ளது.

இதன் மூலம் வேண்டுமென்றே செய்யப்படும் கொடுமைகள் மட்டுமன்றி, அடிப்படைப் பராமரிப்பை மறுப்பதும் சட்டத்தின் கீழ் தண்டனைக்குரிய குற்றமாக மாறுகிறது.

புதிய சட்டமூலத்தின் விதிகளை மீறும் நபர்களுக்கு கடுமையான தண்டனைகள் முன்மொழியப்பட்டுள்ளன. விலங்குகளைக் கொடுமைப்படுத்தியதாகக் குற்றவாளியாக நிரூபிக்கப்படும் ஒருவர் ரூபா 250,000-ஐ மிகாத அபராதம் அல்லது இரண்டு ஆண்டுகளுக்கு குறையாத சிறைத்தண்டனை அல்லது இரண்டையும் எதிர்கொள்ள நேரிடலாம்.

அதேவேளை, விலங்கொன்றை கொடூரமான முறையில் கொன்றதாகக் குற்றம் நிரூபிக்கப்பட்டால் ரூபா 500,000-க்கு குறையாத அபராதம் அல்லது மூன்று ஆண்டுகள் சிறைத்தண்டனை அல்லது இவ்விரு தண்டனைகளும் விதிக்கப்படலாம் என சட்டமூலத்தில் குறிப்பிடப்பட்டுள்ளது.

செல்லப்பிராணிகளை வளர்த்துவிட்டு பின்னர் அவற்றைக் கைவிடுவது தொடர்பிலும் புதிய சட்ட ஏற்பாடுகள் அறிமுகப்படுத்தப்படுகின்றன.

நோயுற்ற அல்லது ஊனமுற்ற விலங்குகளைப் பொது இடங்களில் கைவிடுதல், சிகிச்சை வழங்காமல் புறக்கணித்தல் மற்றும் அவற்றின் நலனைப் பாதுகாக்கத் தவறுதல் போன்ற செயல்களுக்கு எதிராக சட்ட நடவடிக்கை எடுக்கப்படும்.

மேலும், சட்டவிரோதமான கருத்தடைச் சிகிச்சைகள் மேற்கொள்வது மற்றும் தகுதியற்ற நபர்கள் விலங்குகளுக்கு மருத்துவ சிகிச்சை அளிப்பதும் தண்டனைக்குரிய குற்றங்களாகக் கருதப்படவுள்ளன.

விலங்குகளைப் பயன்படுத்தி நடத்தப்படும் சண்டைகள், விலங்குகளுக்குக் காயம் அல்லது மரணத்தை ஏற்படுத்தும் வேட்டை விளையாட்டுகள் மற்றும் விலங்குகளுக்கு இடையிலான சண்டைகளை நடத்துதல் ஆகியவற்றுக்கும் முழுமையான தடை விதிக்க சட்டமூலம் முன்மொழிகிறது.

அத்துடன், இவ்வாறான நிகழ்வுகளை ஏற்பாடு செய்தல், நிர்வகித்தல், அதற்கான வசதிகளை ஏற்படுத்துதல் அல்லது விளம்பரப்படுத்துதல் ஆகியனவும் குற்றமாகக் கருதப்படும்.

விலங்குகளை ஒரு இடத்திலிருந்து மற்றொரு இடத்திற்குக் கொண்டு செல்லும்போது அவற்றுக்கு தேவையற்ற வலி, துன்பம், காயம் அல்லது விபத்து ஏற்படாத வகையில் பாதுகாப்பாகக் கொண்டு செல்ல வேண்டும் என புதிய நிபந்தனைகள் அறிமுகப்படுத்தப்படுகின்றன.

இந்த விதிகளை மீறுவோருக்கு ரூபா 300,000-க்கு குறையாத அபராதம் அல்லது இரண்டு ஆண்டுகள் வரை சிறைத்தண்டனை அல்லது இரண்டும் விதிக்கப்படலாம்.

செல்லப்பிராணி விற்பனை நிலையங்கள் மற்றும் செல்லப்பிராணி இனப்பெருக்க நிலையங்களுக்கு கட்டாய அனுமதிப்பத்திர முறைமையை அறிமுகப்படுத்தவும் சட்டமூலம் முன்மொழிகிறது. இதன் மூலம் விலங்கு வர்த்தகம் மற்றும் இனப்பெருக்கம் தொடர்பான நடவடிக்கைகளை சட்டரீதியாக ஒழுங்குபடுத்தவும் கண்காணிக்கவும் முடியும் என எதிர்பார்க்கப்படுகிறது.

விலங்கு நலன் தொடர்பான சட்ட ஏற்பாடுகளை மறுஆய்வு செய்து பொருத்தமான பரிந்துரைகளை முன்வைப்பதற்காக, 2025 டிசம்பர் 29ஆம் திகதியிட்ட அமைச்சரவைத் தீர்மானத்தின் அடிப்படையில் விவசாய, கால்நடை, காணி மற்றும் நீர்ப்பாசன அமைச்சின் செயலாளரால் நிபுணர் குழுவொன்று நியமிக்கப்பட்டது.

அந்தக் குழு சமர்ப்பித்த பரிந்துரைகளின் அடிப்படையில் இறுதிச் சட்டமூலத்தைத் தயாரிக்குமாறு 2026 மே 18ஆம் திகதி நடைபெற்ற அமைச்சரவைக் கூட்டத்தில் சட்டவரைஞருக்கு அறிவுறுத்தப்பட்டது.

அதன்படி சட்டவரைஞரால் தயாரிக்கப்பட்ட சட்டமூலத்திற்கு சட்டமா அதிபரின் அனுமதியும் கிடைத்துள்ளதுடன், அரசாங்க வர்த்தமானியில் வெளியிடப்பட்ட பின்னர் நாடாளுமன்றத்தின் ஒப்புதலுக்காக சமர்ப்பிக்க அமைச்சரவை அனுமதி வழங்கியுள்ளது.

சட்டம் மட்டுமன்றி சமூகப் பொறுப்பும் அவசியம் இந்தப் புதிய சட்டம் அமலுக்கு வந்தால், விலங்குகளைக் கொடுமைப்படுத்துதல், அவற்றைப் புறக்கணித்தல் மற்றும் விலங்குகள் சார்ந்த வர்த்தக நடவடிக்கைகள் தொடர்பில் தெளிவான மற்றும் வலுவான சட்டக் கட்டமைப்பு உருவாகும் என எதிர்பார்க்கப்படுகிறது. எனினும், விலங்குகளின் நலனை சட்டம் மட்டுமே உறுதிப்படுத்த முடியாது.

விலங்குகளைப் பொறுப்புடன் பராமரித்தல், அவற்றுக்குத் தேவையான உணவு, நீர், இருப்பிடம் மற்றும் மருத்துவப் பராமரிப்பை வழங்குதல், கொடுமைகளுக்கு எதிராகக் குரல் கொடுத்தல் ஆகியவை சமூகத்தில் உள்ள ஒவ்வொருவரின் பொறுப்பாகும்.

விலங்குகளைத் துன்புறுத்திய பின்னர் தண்டனை வழங்குவது மட்டுமன்றி, விலங்குகள் மீது கருணை, மனிதநேயம் மற்றும் பொறுப்புணர்வை வளர்க்கும் சமூகத்தை உருவாக்குவதே இந்தப் புதிய விலங்கு நலச் சட்டமூலத்தின் பிரதான நோக்கமாகும்.

நாட்டிலுள்ள பேருந்துகளுக்கு கட்டாயமாக்கப்படும் நடைமுறை ; எடுக்கப்பட்டுள்ள அதிரடி தீர்மானம்