பாதசாரிகள் கடவையில் அட்டகாசம்; பாதசாரியை தாக்கிய சாரதி கஞ்சா பாவனையாளர் என மருத்துவ அறிக்கையில் உறுதி
கொழும்பு, பொரளை – கனத்தை சுற்றுவட்டத்துக்கு அருகில் போக்குவரத்து விதிகளை மீறி, பாதசாரிகள் கடவையை மறித்து, பாதசாரி ஒருவரைத் தாக்கி அச்சுறுத்திய சாரதி கஞ்சா போதைப்பொருள் பாவனையாளர் என்பது மருத்துவப் பரிசோதனைகள் மூலம் உறுதிப்படுத்தப்பட்டுள்ளதாகப் போக்குவரத்துக் கட்டுப்பாடு மற்றும் வீதிப் பாதுகாப்புப் பிரிவுக்குப் பொறுப்பான பிரதிப் பொலிஸ் மாஅதிபர் டபிள்யூ.பி.ஜே. சேனாதீர தெரிவித்துள்ளார்.
கடந்த 20ஆம் திகதி பிற்பகல் சுமார் 3.30 மணியளவில் பொரளை கனத்தை சுற்றுவட்டத்துக்கு அருகிலுள்ள பாதசாரிகள் கடவையில் இந்தச் சம்பவம் இடம்பெற்றுள்ளது.
இறுதிச் சடங்கொன்றில் கலந்துகொள்வதற்காகச் சென்ற தம்பதியினர், குறித்த பாதசாரிகள் கடவையின் ஊடாக வீதியைக் கடக்க முற்பட்டுள்ளனர்.
இதன்போது, போக்குவரத்துச் சமிக்ஞை விளக்கு சிவப்பு நிறத்தில் காணப்பட்ட நிலையிலும், இராஜகிரிய திசையிலிருந்து கனத்தை சுற்றுவட்டத்தை நோக்கிப் பயணித்த கார் ஒன்று பாதசாரிகள் கடவையை மறித்து நிறுத்தப்பட்டிருந்ததாகத் தெரிவிக்கப்படுகிறது.

இதன்போது காரின் சாரதி தொடர்ச்சியாக ஒலிப்பானை ஒலிக்கச் செய்ததுடன், தம்பதியினருடன் வாக்குவாதத்திலும் ஈடுபட்டுள்ளார்.
இதனைத் தொடர்ந்து, பாதசாரிகளில் ஒருவரைத் தாக்கி அச்சுறுத்தியதாகவும் பொலிஸ் விசாரணைகளில் தெரியவந்துள்ளது.
குறித்த சம்பவம் தொடர்பான காணொளி மற்றும் பதிவுகள் சமூக வலைத்தளங்களில் வெளியாகிப் பெரும் கவனத்தைப் பெற்றதைத் தொடர்ந்து, பொரளை பொலிஸார் விசாரணைகளை ஆரம்பித்தனர்.
விசாரணைகளின் அடிப்படையில், பொரளைப் பகுதியைச் சேர்ந்த 37 வயதுடைய சந்தேகநபர் ஒருவரைப் பொலிஸார் கைது செய்துள்ளனர்.
கைது செய்யப்பட்ட சந்தேகநபர் கொழும்பு பிரதம சட்ட வைத்திய அதிகாரி முன்னிலையில் ஆஜர்படுத்தப்பட்டு மருத்துவப் பரிசோதனைக்கு உட்படுத்தப்பட்டுள்ளார்.
இதன்போது, அவர் கஞ்சா போதைப்பொருளைப் பயன்படுத்துபவர் என்பது மருத்துவ அறிக்கைகள் மூலம் உறுதிப்படுத்தப்பட்டுள்ளதாகப் பிரதிப் பொலிஸ் மாஅதிபர் டபிள்யூ.பி.ஜே. சேனாதீர தெரிவித்துள்ளார்.
இதனையடுத்து, சந்தேகநபர் நீதிமன்றத்தில் ஆஜர்படுத்தப்பட்டுள்ளார்.
அவரைத் தலா ஐந்து இலட்சம் ரூபாய் பெறுமதியான இரண்டு சரீரப் பிணைகளில் விடுவிக்க நீதிமன்றம் உத்தரவிட்டுள்ளது.
பாதசாரிகள் கடவையில் வீதியைக் கடக்கும் மக்களின் பாதுகாப்பை உறுதிப்படுத்த வேண்டியதன் அவசியத்தையும், போக்குவரத்து விதிகளை மீறி பொதுமக்களுக்கு அச்சுறுத்தல் ஏற்படுத்தும் சாரதிகளுக்கு எதிராகச் சட்ட நடவடிக்கை எடுக்கப்பட வேண்டியதன் முக்கியத்துவத்தையும் இந்தச் சம்பவம் மீண்டும் கவனத்திற்குக் கொண்டுவந்துள்ளது.