புத்தாண்டு பிறக்கும் முன் இந்த பொருட்களை வீட்டிலிருந்து அகற்றினால் இத்தனை நன்மைகளா?

2024ம் ஆண்டின் இறுதி நாளுக்கு வந்து விட்டோம். பிறக்க போகும் 2025ம் ஆண்டு நம்முடைய விருப்பங்களை நிறைவேற்றி, செல்வ வளங்கள் பலவற்றையும் தரும் ஆண்டாக இருக்கும் என்ற நம்பிக்கையில் புத்தாண்டை வரவேற்க அனைவரும் தயாராக இருக்கிறோம்.

நாம் நினைப்பது போல் நம்முடைய வாழ்விலும், வீட்டிலும் நல்ல விஷயங்கள் நிறைவதற்கு முதலில் வீட்டில் உள்ள எதிர்மறை ஆற்றல்களை வெளியேற்ற வேண்டும்.

புத்தாண்டில் தடைகள் நீங்கி, புதிய வாய்ப்புகள் உருவாகி, வாழ்க்கையில் வளர்ச்சி, செல்வ வளம் ஏற்படுவதற்கு புத்தாண்டு பிறப்பதற்கு முன்பாக வீட்டில் இருந்து முக்கியமான  இந்த 5 பொருட்களை வெளியேற்றினால்  நம் வாழ்வில் எவ்வாறு நற்பலன் கிடைக்கும் என நாம் இங்கு பார்ப்போம்.

உடைந்த பொருட்கள் 

வீட்டில் இருந்து உடைந்த அல்லது சேதமடைந்த பொருட்களை அகற்றுவதால் துதிர்ஷ்டங்கள் ஏற்படுவதில் இருந்து விடுபடலாம். இவைகள் எதிர்மறை ஆற்றல்களை எளிதில் ஈர்க்கக் கூடியவை ஆகும். உடைந்த பொருட்கள், பழுதான சாதனங்கள், விரிசல் விழுந்த கண்ணாடி, உடைந்த நாற்காலி ஆகியவற்றை வீட்டில் இருந்து அப்புறப்படுத்தி விட்டு புதியவற்றை வாங்கலாம். நல்ல நிலையில் இருக்கும் பொருட்களாக மாற்றுவதால் வளர்ச்சி, நேர்மறை ஆற்றல்கள் ஏற்படும்.

பழைய, தேவையற்ற பொருட்கள்

வீட்டில் இருக்கும் பழைய, பயன்படுத்தாமல் இருக்கும் தேவையற்ற பொருட்களை வீட்டில் இருந்து அகற்றுவதால் புதிய வாய்ப்புகள் உங்களை தேடி வரும். வீட்டில் தேவையற்ற பொருட்களை வைத்து அடைத்து வைப்பதால் முயற்சிகளில் தேக்க நிலை என்பது ஏற்படும். பழைய துணிகள், புத்தகங்கள், பாத்திரங்கள் ஆகியவற்றை வீட்டில் இருந்து வெளியேற்றி விடலாம். வேறு யாருக்காவது தானமாகவும் அல்லது மறு சுழற்சி முறையில் பயன்படுத்தக் கூடியதாகவும் மாற்றி அமைக்கலாம். இதனால் நேர்மறையான விஷயங்கள் எப்போது வீட்டில் நடந்து கொண்டே இருக்கும்.

காய்ந்த பூக்கள்

தேங்கிய நீர், காய்ந்த பூக்கள் ஆகியவற்றை வீட்டில் இருந்து தூக்கி எறிவதால் எதிர்மறை ஆற்றல்கள் வீட்டில் பரவுவதை தடுக்கலாம். தேங்கிய தண்ணீரில் கொசுக்கள் வளர்ந்து, துர்நாற்றம் வீசும். அதே போல் காய்ந்த மலர்கள் எதிர்மறை ஆற்றல்களின் அடையாளமாகவும், சோகமான தன்மையையும் குறிப்பதாகும். புதிதாக இருக்கும் மலர்கள், புதிய தண்ணீர் ஆகியவற்றால் வீட்டில் எப்போதும் புத்துணர்ச்சி நிறைந்திருக்கும். மகிழ்ச்சி மலரும்.

உடைந்த கண்ணாடி

உடைந்த கண்ணாடி அல்லது கண்ணாடி பொருட்களை வீட்டில் வைத்திருப்பது அபசகுனமாக பார்க்கப்படுகிறது. இவற்றை வீட்டில் வைத்திருப்பதால் வீட்டில் அடிக்கடி சண்டை சச்சரவுகள் இருந்து கொண்டே இருக்கும். கீறல் விழுந்த கண்ணாடியை மாற்றி விட்டு புதிய கண்ணாடியை மாற்றி அமைக்கலாம். அதிலும் இயற்கை வெளிச்சத்தை பிரதிபலிக்கும் வகையில் கண்ணாடியை வைப்பதால் வீட்டில் ஒளிமயமான சூழலும், நேர்மறை ஆற்றல்களும் நிறைந்திருக்க செய்யும்.

காலாவதியான பொருட்கள்

காலாவதியான உணவுப் பொருட்கள், மருந்துகள், அழகு சாதனப் பொருட்களை வீட்டில் வைத்திருப்பதால் வீட்டில் தேக்க நிலை, எதிர்மறையான சூழல் இருந்து கொண்டே இருக்கும். இதனால் வீட்டில் அடிக்கடி நோய்களும் வந்து கொண்டே இருக்கும். ஆரோக்கியமான சூழலை வீட்டில் உருவாக்கவும், புதிய வாய்ப்புகள், நல்ல விஷயங்கள் தேடி வருவதற்கும் காலாவதியான பொருட்களை அகற்றி விட்டு, சுத்தமான காற்று, ஆற்றல் வந்து செல்லும் வகையில் வீட்டை காற்றோட்டம் உள்ளதாக வைத்திருக்க வேண்டும்.