ஹிஜாப் விவகாரத்தில் சட்டம் என்றால், அனோஜன் விடயத்திலும் சவுதி சட்டமா? ; ஹரீஸ் கேள்வி

சவூதி அரேபியாவில் மரண தண்டனை விதிக்கப்பட்டுள்ள இலங்கையைச் சேர்ந்த சிவராசா அனோஜன் விவகாரத்தில், சவூதி சட்டத்தின்படியே அந்நாட்டு அரசாங்கம் செயற்படுகிறது எனக் கூற முடியுமா என முன்னாள் இராஜாங்க அமைச்சர் சட்டத்தரணி எச்.எம்.எம். ஹரீஸ் கேள்வியெழுப்பியுள்ளார்.

யாழ்–கொழும்பு பயணிகளே அவதானம் ; திருமுறிகண்டியில் பெண் தொடர்பில் எச்சரிக்கை

பெண்களின் ஹிஜாப் தொடர்பான விவகாரத்தில் வைத்தியசாலை நிர்வாகம் சட்டத்தின்படியே செயற்படுவதாக தமிழ் அரசியல் தலைமைகள் தெரிவித்திருந்த நிலையில், அதே அடிப்படையில் அனோஜன் விவகாரத்திலும் சவூதி அரசாங்கம் தனது சட்டங்களின்படியே செயற்படுகிறது என முஸ்லிம் அரசியல் தலைமைகள் கூறியிருக்கலாம் என அவர் குறிப்பிட்டார்.

பெண்களின் ஹிஜாப் தொடர்பான விவகாரம்

எனினும், மனிதாபிமான அடிப்படையில் அனோஜனின் உயிரைக் காப்பாற்ற முஸ்லிம் நாடாளுமன்ற உறுப்பினர்கள் மற்றும் முஸ்லிம் சமூகத்தினர் முயற்சிகளை மேற்கொண்டதாகவும் ஹரீஸ் தெரிவித்தார்.

கல்முனையில் இஸ்லாமிய சமூக சங்கம் ஏற்பாடு செய்திருந்த நிகழ்வில் சனிக்கிழமை மாலை பிரதம அதிதியாகக் கலந்துகொண்டு உரையாற்றிய போதே அவர் இவ்வாறு தெரிவித்தார்.

அனோஜன் விவகாரத்தில் முஸ்லிம் நாடாளுமன்ற உறுப்பினர்கள் ஒன்றிணைந்து சவூதி மன்னரிடம் அவரது விடுதலை தொடர்பில் கோரிக்கை விடுத்ததைச் சுட்டிக்காட்டிய ஹரீஸ், கல்முனை வடக்கு வைத்தியசாலையில் முஸ்லிம் பெண்கள் ஹிஜாப் அணிந்து செல்வது தொடர்பாக எழுந்த பிரச்சினையில் தமிழ் அரசியல் தலைமைகள் போதிய அக்கறையுடன் செயற்படவில்லை எனத் தனது கவலையை வெளியிட்டார்.

முஸ்லிம் பெண்களின் மதக் கடமை மற்றும் கண்ணியத்துடன் தொடர்புடைய ஆடை விவகாரங்களில், நாட்டின் ஏனைய வைத்தியசாலைகளில் பின்பற்றப்படும் நடைமுறைகள் ஏற்றுக்கொள்ளப்பட்டுள்ள நிலையில், குறிப்பிட்ட ஒரு வைத்தியசாலையில் மாத்திரம் பிரச்சினை எழுந்திருப்பது குறித்தும் அவர் கேள்வி எழுப்பினார்.

கல்முனை மாநகரம் தமிழ், முஸ்லிம், பௌத்த மற்றும் கிறிஸ்தவ மக்கள் நீண்டகாலமாக இணைந்து வாழும் பிராந்தியமாக உள்ளதாகக் குறிப்பிட்ட அவர், மாநகரத்தை நிர்வாக ரீதியாகப் பிரிப்பது தொடர்பான முயற்சிகள் குறித்து கவலை தெரிவித்தார்.

தமிழ் மக்களின் உரிமைகள் தொடர்பான கோரிக்கைகள் நியாயமானதாகவும் நிலத்தொடர்புடையதாகவும் இருக்கும் பட்சத்தில், அவை குறித்து முஸ்லிம் அரசியல் தலைமைகள் மற்றும் சிவில் சமூகத்துடன் கலந்துரையாடி தீர்வை எட்ட முடியும் எனவும் அவர் தெரிவித்தார்.

முஸ்லிம் சமூகத்திற்கு பாதிப்பை ஏற்படுத்தக்கூடிய நிர்வாக மாற்றங்களை நீதிமன்றத்தின் ஊடாக முன்னெடுப்பதற்கு முன்னர், தமிழ் மற்றும் முஸ்லிம் அரசியல் தலைமைகள் பரஸ்பர பேச்சுவார்த்தை மூலம் தீர்வுகளை காண வேண்டும் எனவும் ஹரீஸ் வலியுறுத்தினார்.

கடந்த கால யுத்த சூழ்நிலையில் இடம்பெற்ற தவறுகள் மீண்டும் ஏற்படாத வகையில், இரு சமூகங்களின் உரிமைகளையும் மதித்து நல்லிணக்கத்தை முன்னெடுக்க வேண்டும் எனவும் அவர் குறிப்பிட்டார்.

மேலும், முஸ்லிம் சமூகத்தின் உரிமைகள் தொடர்பான பிரச்சினைகளில் முஸ்லிம் நாடாளுமன்ற உறுப்பினர்கள் ஒன்றிணைந்து செயற்பட வேண்டும் எனவும், தேர்தல் காலங்களில் மாத்திரமன்றி சமூகத்தின் இருப்புக்கும் உரிமைகளுக்கும் அச்சுறுத்தல் ஏற்படும் சந்தர்ப்பங்களிலும் அரசியல் தலைமைகள் களத்தில் இறங்க வேண்டும் எனவும் ஹரீஸ் கேட்டுக்கொண்டார்.

கல்முனை மற்றும் அம்பாறை மாவட்ட முஸ்லிம் மக்களின் உரிமைகள் தொடர்பான பிரச்சினைகளுக்கு தமிழ் மற்றும் முஸ்லிம் அரசியல் தலைமைகள் பரஸ்பர புரிந்துணர்வு மற்றும் பேச்சுவார்த்தை மூலம் நீதியான தீர்வை காண முயற்சிக்க வேண்டும் என்பதே தமது முக்கிய வேண்டுகோள் எனவும் அவர் தெரிவித்தார்.

மீண்டும் பொருளாதார நெருக்கடி ஏற்படும் அபாயம் ; IMF தொடர்பில் எச்சரிக்கை