யாழில் 14 வயதுச் சிறுமியை கடத்திச் செல்ல முயற்சி ; துரத்திப் பிடித்த பொதுமக்கள்

யாழ்ப்பாணம் சுன்னாகம் பொலிஸ் பிரிவுக்கு உட்பட்ட பகுதியில் 12 வயது சிறுமி ஒருவர்  கடந்த 24 ஆம் திகதி  பிற்பகல் கடத்திச் செல்லப்பட்டதாகக் கூறப்படும் சம்பவம் பெரும் பரபரப்பை ஏற்படுத்தியுள்ளதாக சமூக வலைத்தளப்பதிவு ஒன்று வெளியாகியுள்ளது.

இணையத்தில் விற்கப்படும் பெண்களின் புகைப்படங்கள் ; சமூக ஊடக மோசடி குறித்து எச்சரிக்கை

பொதுமக்களின் துரிதமான முயற்சியினால் குறுகிய நேரத்திற்குள் சிறுமி மீட்கப்பட்டதாக அப்பகுதி மக்கள் தெரிவித்துள்ளனர்.

சம்பவம் தொடர்பில் கிடைத்த தகவல்களின்படி, சபாபதிப் பிள்ளை வீதியைச் சேர்ந்த 12 வயது சிறுமி ஒருவர் நேற்று பிற்பகல் சுமார் 2.30 மணியளவில் கல்வி நிலையம் ஒன்றுக்குச் சென்று கொண்டிருந்தார்.

அப்போது சிவப்பு நிற ஓட்டோ ஒன்றில் வந்த சிலர் சிறுமியை வலுக்கட்டாயமாக அழைத்துச் சென்றதாகக் கூறப்படுகிறது. சம்பவம் குறித்து தகவலறிந்த அப்பகுதி மக்கள் உடனடியாக மேற்கொண்ட முயற்சியின் மூலம் சிறுமி குறுகிய நேரத்திலேயே மீட்கப்பட்டதாக தெரிவிக்கப்படுகிறது.

இச்சம்பவத்துடன் தொடர்புடையதாகக் கூறப்படும் ஒருவர் மீது ஏற்கனவே போதைப்பொருள் விற்பனை மற்றும் பாவனை தொடர்பான வழக்குகள் உள்ளிட்ட பல்வேறு குற்றச்சாட்டுகள் இருப்பதாகவும், அவர் பாடசாலை மாணவிகளைத் தொந்தரவு செய்து வருவதாக முன்னதாகவே அப்பகுதியில் முறைப்பாடுகள் எழுந்திருந்ததாகவும் தகவல்கள் வெளியாகியுள்ளன.

எனினும், இந்தக் குற்றச்சாட்டுகள் தொடர்பில் அதிகாரப்பூர்வ விசாரணைகள் மற்றும் சட்ட நடவடிக்கைகளின் முடிவுகளே இறுதியானவை எனக் குறிப்பிடப்படுகிறது.

குறித்த நபர் பாடசாலை முடிவடையும் நேரங்களில் பாடசாலை வளாகத்திற்கு அருகில் நின்று மாணவிகளிடம் தகாத முறையில் நடந்துகொள்வதாகவும் சிலர் குற்றஞ்சாட்டியுள்ளனர்.

இந்தக் குற்றச்சாட்டுகள் தொடர்பிலும் உரிய அதிகாரிகள் விசாரணை நடத்த வேண்டும் என பொதுமக்கள் கோரிக்கை விடுத்துள்ளனர்.

சிறுமி கடத்தப்பட்டதாகக் கூறப்படும் சம்பவம் தொடர்பில் சுன்னாகம் பொலிஸாருக்கு தகவல் வழங்கப்பட்டதாகவும், சம்பவத்துடன் தொடர்புடையவர்களை உடனடியாகக் கைது செய்து சட்டத்தின் முன் நிறுத்த வேண்டும் என அப்பகுதி மக்கள் வலியுறுத்தியுள்ளதாகவும் தெரிவிக்கப்படுகிறது.

எனினும், இதுகுறித்து பொலிஸாரின் அதிகாரப்பூர்வ நிலைப்பாடு இதுவரை வெளியாகவில்லை.

சுன்னாகம் பகுதியில் அண்மைக்காலமாக இடம்பெற்று வருவதாகக் கூறப்படும் பல்வேறு குற்றச்செயல்கள் குறித்து மக்கள் மத்தியில் கவலை மற்றும் அச்சம் நிலவி வருவதாகவும், குறிப்பாக பெண்கள் மற்றும் சிறுவர்களின் பாதுகாப்பை உறுதிப்படுத்த பொலிஸார் மற்றும் சம்பந்தப்பட்ட அதிகாரிகள் துரித நடவடிக்கை எடுக்க வேண்டும் எனவும் பொதுமக்கள் கோரிக்கை விடுத்துள்ளனர்.

இந்தச் சம்பவம் தொடர்பில் முழுமையான விசாரணை நடத்தப்பட்டு, உண்மைகள் வெளிக்கொணரப்பட வேண்டும் என்பதுடன், சிறுமிகளின் பாதுகாப்பை உறுதிப்படுத்த உடனடி நடவடிக்கைகள் மேற்கொள்ளப்பட வேண்டும் என்றும் அப்பகுதி மக்கள் வலியுறுத்தியுள்ளனர்.

நேபாளத்தில் உள்ள இலங்கையர்களுக்கு அவசர அறிவித்தல்