2 லட்சம் லஞ்சம் ; சிறையில் கடத்தல்காரருக்கு கைபேசி வழங்கிய கான்ஸ்டபிள்

  பயங்கரவாதத் தடுப்புச் சட்டத்தின் கீழ் தடுத்து வைக்கப்பட்டுள்ள, போதைப்பொருள் கடத்தலில் முக்கிய நபர் எனக் கருதப்படும் ஒருவருக்கு, பொலிஸ் சிறையறையிலிருந்து தொலைபேசி அழைப்புகளை மேற்கொள்வதற்காகத் தனது கைபேசியை வழங்கிய குற்றச்சாட்டில் பொலிஸ் கான்ஸ்டபிள் ஒருவர் கைது செய்யப்பட்டுள்ளார்.

கொழும்பு மத்திய குற்றப் புலனாய்வுப் பிரிவில் கடமையாற்றிய இந்த கான்ஸ்டபிள், இச்சலுகையை வழங்குவதற்காக இரண்டு லட்சம் ரூபாயைப் லஞ்சமாகப் பெற்றுக்கொண்டது விசாரணைகளில் தெரியவந்துள்ளது.

டுபாயில் கைது செய்யப்பட்ட ஷிரான் பாசிக் 

டுபாயில் கைது செய்யப்பட்டு நாட்டிற்கு அழைத்து வரப்பட்ட ஷிரான் பாசிக் (Shiran Basik) எனும் குறித்த சந்தேகநபர், கொழும்பு மத்திய குற்றப் புலனாய்வுப் பிரிவின் சிறையறையில் பலத்த பாதுகாப்பின் கீழ் தடுத்து வைக்கப்பட்டுள்ளார்.

கடந்த 25-ஆம் திகதி மாலை 6:00 மணி முதல் மறுநாள் காலை 6:00 மணி வரை, இச்சந்தேகநபரின் பாதுகாப்பிற்காக குறித்த கான்ஸ்டபிள் பணியில் அமர்த்தப்பட்டிருந்தார். பணி நேரத்தில், அந்த கான்ஸ்டபிள் தனது கைபேசியைச் சந்தேகநபரிடம் வழங்கியுள்ளார்.

கைபேசியைப் பெற்றுக்கொண்ட ஷிரான் பாசிக், சிறையறையிலிருந்த கழிவறைக்குள் சென்று, தான் தொடர்புகொள்ள விரும்பிய நபர்களுக்கு இரகசியமாக அழைப்புகளை மேற்கொண்டதாக மூத்த பொலிஸ் அதிகாரி ஒருவர் உறுதிப்படுத்தினார்.

சிறுவர்கள் இருவர் போதைப்பொருளுக்கு அடிமை; சகோதரி நிர்கதியில்; உறவினர்களுக்கு நீதிமன்றம் அழைப்பு

இந்த வசதியைச் செய்துகொடுத்ததற்காக, அந்த கான்ஸ்டபிளுக்கு இரண்டு லட்சம் ரூபாய் தருவதாகச் சந்தேகநபர் வாக்குறுதி அளித்திருந்தார்.

தொலைபேசி அழைப்புகளை மேற்கொண்ட பின்னர், பொரளை பகுதிக்குச் சென்று அந்தப் பணத்தைப் பெற்றுக்கொள்ளுமாறு ஷிரான் பாசிக், கான்ஸ்டபிளிடம் கூறியுள்ளார்.

அதன்படி, பொரளை பகுதிக்குச் சென்ற கான்ஸ்டபிள், அங்கு ஒரு நபரைச் சந்தித்து அந்த இரண்டு லட்சம் ரூபாயைப் பெற்றுக்கொண்டதாகப் பொலிஸ் வட்டாரங்கள் தெரிவிக்கின்றன.

இந்தச் சம்பவம் குறித்த தகவல்கள் வெளிவந்ததையடுத்து, கடந்த மாதம் 28-ஆம் திகதி கொழும்பு மத்திய குற்றப் புலனாய்வுப் பிரிவின் அதிகாரிகள் குழு, குறித்த கான்ஸ்டபிளைக் கைது செய்தது.

கைது செய்யப்பட்டபோது, ​​அவரிடமிருந்து லஞ்சப் பணத்தில் எஞ்சியிருந்த ஐந்தாயிரம் ரூபாய் மீட்கப்பட்டது. அதனைத் தொடர்ந்து, அவரிடம் மேற்கொள்ளப்பட்ட விசாரணைகளின் மூலம் கிடைத்த தகவல்களின் அடிப்படையில், அவரது வீட்டில் மறைத்து வைக்கப்பட்டிருந்த மீதமுள்ள ஒரு லட்சத்து தொண்ணூற்றையாயிரம் ரூபாயையும் புலனாய்வாளர்கள் கண்டெடுத்தனர்.

அந்தக் கான்ஸ்டபிள் பயன்படுத்திய மூன்று நவீன கைபேசிகளும் பொலிஸாரால் கைப்பற்றப்பட்டுள்ளன.

இந்தக் கைபேசிகளிலிருந்து மேற்கொள்ளப்பட்ட மற்றும் பெறப்பட்ட அழைப்புகள் குறித்தும், ஷிரான் பாசிக்கின் நடவடிக்கைகள் குறித்தும் கொழும்பு மத்திய குற்றப் புலனாய்வுப் பிரிவினர் மேலதிக விசாரணைகளை மேற்கொண்டு வருகின்றனர்.