லங்காசிறி FM
முன்னாள் ஜனாதிபதி ரணில் விக்ரமசிங்க நீதிமன்றத்தில் ஆஜர்; நீதிமன்றம் விடுத்த உத்தரவு
ரணில் வழக்கு ; செப்டம்பர் 30-ஆம் திகதி மீண்டும் விசாரணை
அரசு நிதியைத் தவறாகப் பயன்படுத்தியதாகக் குற்றம் சாட்டப்பட்டுள்ள முன்னாள் ஜனாதிபதி ரணில் விக்ரமசிங்க மற்றும் முன்னாள் ஜனாதிபதியின் செயலாளர் சமன் ஏக்கநாயக்க ஆகியோருக்கு எதிரான வழக்கு, சட்ட நடவடிக்கைகள் குறித்த சட்டமா அதிபரின் நிலைப்பாட்டை அறிந்துகொள்வதற்காக செப்டம்பர் 30-ஆம் திகதி மீண்டும் விசாரணைக்கு எடுத்துக்கொள்ளப்படும் என கொழும்பு கோட்டை நீதவான் நீதிமன்றம் இன்று (08) உத்தரவிட்டது.
இந்த வழக்கு நீதவான் பாசன் அமரசேன முன்னிலையில் விசாரணைக்கு எடுத்துக்கொள்ளப்பட்டது. விசாரணைகள் நிறைவடைந்து, அது தொடர்பான அறிக்கை சட்டமா அதிபருக்கு அனுப்பப்பட்டுள்ளதாக குற்றப் புலனாய்வுத் திணைக்கள (CID) அதிகாரிகள் நீதிமன்றத்திற்குத் தெரிவித்தனர்.
இதனை உறுதிப்படுத்திய சிரேஷ்ட அரச சட்டத்தரணி, சட்டமா அதிபரின் நிலைப்பாட்டை முன்வைப்பதற்கு ஒரு திகதியை வழங்குமாறு கோரினார். இதற்கிடையில், சர்ச்சைக்குரிய நிதியில் சுமார் பாதி அளவு வாகனங்களுக்காகச் செலவிடப்பட்டதாக விசாரணையாளர்கள் கூறியுள்ளதாக விக்ரமசிங்கவின் சட்டத்தரணி சுட்டிக்காட்டினார்.
இருப்பினும், அந்த வாகனங்கள் பிரித்தானிய அரசாங்கத்தால் வழங்கப்பட்டவை என்று வாதிட்ட அவர், அது தொடர்பான ஆவணம் ஒன்றை அரச சட்டத்தரணியிடம் கையளித்து, மேலதிக விசாரணையை மேற்கொள்ளுமாறும் கோரினார்.
தரப்பு வாதங்களைக் கருத்தில் கொண்ட நீதவான், செப்டம்பர் 30-ஆம் திகதி இவ்வழக்கை மீண்டும் விசாரணைக்கு எடுத்துக்கொள்ளுமாறும், அன்று சட்டமா அதிபரின் நிலைப்பாட்டை நீதிமன்றத்திற்குத் தெரிவிக்குமாறும் உத்தரவிட்டார்.
முன்னாள் ஜனாதிபதியின் மனைவியின் பட்டமளிப்பு விழாவில் கலந்துகொள்வதற்காக 2023-ஆம் ஆண்டு ஐக்கிய இராச்சியத்திற்கு மேற்கொண்ட தனிப்பட்ட பயணத்திற்காக, 16.6 மில்லியன் ரூபாவிற்கும் அதிகமான அரச நிதியைத் தவறாகப் பயன்படுத்தியதாகக் குற்றம் சாட்டி, விக்ரமசிங்க மற்றும் ஏக்கநாயக்க ஆகியோரை குற்றப் புலனாய்வுத் திணைக்களம் சந்தேகநபர்களாகப் பெயரிட்டுள்ளது.
முதலாம் இணைப்பு
அரசு நிதி முறைகேடு குற்றச்சாட்டு தொடர்பான வழக்கு விசாரணைக்காக முன்னாள் ஜனாதிபதி ரணில் விக்ரமசிங்க இன்று (08) கொழும்பு கோட்டை நீதவான் நீதிமன்றத்தில் ஆஜராகியுள்ளார்.
அரசாங்கப் பணத்தை முறைகேடாக பயன்படுத்தியதாக முன்வைக்கப்பட்டுள்ள முறைப்பாடு தொடர்பில், ரணில் விக்ரமசிங்க மற்றும் முன்னாள் ஜனாதிபதி செயலாளர் சமன் ஏக்கநாயக்க ஆகியோருக்கு எதிரான விசாரணையின் முன்னேற்றங்களை இன்று நீதிமன்றத்தில் சமர்ப்பிக்குமாறு குற்றப்புலனாய்வுத் திணைக்களத்திற்கு கொழும்பு கோட்டை நீதவான் நீதிமன்றம் முன்னதாக உத்தரவிட்டிருந்தது.
அந்த உத்தரவுக்கு அமையவே, முன்னாள் ஜனாதிபதி ரணில் விக்ரமசிங்க இன்று நீதிமன்றத்தில் முன்னிலையாகியுள்ளார்.
அரியாலை, கொழும்பு, Georgetown, Guyana, Edgware, United Kingdom
17 Jun, 2025
