ஜனாதிபதி அலுவலகத்தில் கோட்டாவின் ஊழியர்கள்; வெளியான தகவல்!

முன்னாள் ஜனாதிபதி கோட்டாபய ராஜபக்ச பதவி விலகி ஓராண்டு கடந்துள்ள நிலையில், அரசியல் ரீதியாக நியமிக்கப்பட்டுள்ள முன்னாள் ஜனாதிபதியின் பணியாளர்கள் புதிதாக உருவாக்கப்பட்ட விசேட திட்டப் பிரிவின் கீழ் ஜனாதிபதி அலுவலகத்தில் தொடர்ந்தும் ஆட்சேர்ப்பு செய்யப்பட்டுள்ளதற்கான ஆதாரங்கள் வெளியாகியுள்ளன.

கொழும்பு ஆங்கில ஊடகம் ஒன்று வெளியிட்டுள்ள செய்தியில் இந்த விடயம் தெரிவிக்கப்பட்டுள்ளன. அதன்படி பொருளாதார நெருக்கடியை ஏற்படுத்திய தவறான நிர்வாகத்தின் காரணமாக கோட்டாபய ராஜபக்ச இராஜினாமா செய்ய நிர்ப்பந்திக்கப்பட்டார்.

இந்நிலையில், ராஜபக்சவின் முன்னாள் தனிச் செயலாளர் சுகீஸ்வர பண்டார உட்பட ராஜபக்சவினால் தெரிவுசெய்யப்பட்ட ஊழியர்கள் அரசிடமிருந்து சம்பளம் மற்றும் சலுகைகளைப் பெறுவதாக அந்த செய்தியில் தெரிவிக்கப்பட்டுள்ளது.

மக்கள் கோபத்தைத் தொடர்ந்து ராஜினாமா செய்த போதிலும், முன்னாள் ஜனாதிபதிக்கான ஊக்கத்தொகையை ராஜபக்சே தொடர்ந்து பெற்று வருகிறார். மேலும், கொழும்பில் மலலசேகர மாவத்தையில் உள்ள அவரது சொகுசு பங்களாவிற்கும், மிரிஹானவில் உள்ள அவரது தனிப்பட்ட இல்லத்துக்கு வெளியேயும் பாதுகாப்பு அளிக்கப்பட்டுள்ளது.

மலாலசேகர மாவத்தையில் 'சத்தம்' மற்றும் பிற பிரச்சனைகள் என்ற முறைப்பாடுகள் காரணமாக கோட்டாபய ராஜபக்ச அங்கு வசிக்கவில்லை, ஆனால் அவருக்கு ஒரு பாதுகாப்புக் குழு நிறுத்தப்பட்டுள்ளது.

பொருளாதார நெருக்கடிக்கு மத்தியிலும் முன்னாள் ஜனாதிபதி அரசின் அனைத்து சலுகைகளையும் அனுபவித்து வருவதோடு, அவருடன் பணியாற்றிய முன்னாள் ஊழியர்களும் ஜனாதிபதி அலுவலகத்தில் பிரத்தியேகமாக உருவாக்கப்பட்ட இந்தப் பிரிவில் தொடர்ந்தும் ஆட்சேர்ப்பு செய்யப்பட்டு வருகின்றனர். கோட்டாபய ராஜபக்ச ஜனாதிபதியாக இருந்த போது அவரின் பிரத்தியேக செயலாளராக இருந்த சுகீஸ்வர பண்டார, தற்போது விசேட திட்டப் பிரிவின் பணிப்பாளர் நாயகமாக செயற்பட்டு வருகின்றார்.

ஜனாதிபதி அலுவலகத்தில் ஆட்சேர்ப்பு செய்யப்பட்ட போதிலும், பண்டார போன்ற அதிகாரிகள் அடிக்கடி கோட்டாபய ராஜபக்சவுடன் நிகழ்வுகளில் செல்வதைக் காணமுடிவதாக அந்த செய்தியில் தெரிவிக்கப்பட்டுள்ளது. ஜனாதிபதி அலுவலகத்தில் முன்னாள் ஜனாதிபதியின் ஊழியர்கள் ஆட்சேர்ப்பு செய்யப்படுவதால், கோட்டாபய ஒரு வருடத்திற்கு முன்னர் பதவியில் இருந்து வெளியேற்றப்பட்ட போதிலும், அரசியல் நியமனம் பெற்றவர்களுக்கு ஏன் இத்தகைய சிறப்புப் பிரிவுகள் தொடர்ந்து இடமளிக்கின்றன என்பது குறித்து கடுமையான கவலைகள் எழுப்பப்பட்டுள்ளது.

இந்நிலையில், ஜனாதிபதி அலுவலகத்தில் விசேட திட்டப் பிரிவு ஒரு 'அலகு' எனவும், கொழும்பிற்கு வெளியே இடம்பெறும் சில செயற்திட்டங்களை ஒருங்கிணைத்து ஜனாதிபதியின் ஊழியர்களுடன் தொடர்பை ஏற்படுத்தவும் அதன் ஊழியர்கள் பணிக்கப்பட்டுள்ளனர் எனவும் ஜனாதிபதி அலுவலகத்தின் சிரேஷ்ட அதிகாரி ஒருவர் தெரிவித்தார்.

பொருளாதார நெருக்கடி இன்னும் முடிவடையாத நிலையில், திறைசேரியின் சுமையைக் குறைக்கும் வகையில் ஊழியர்களைக் குறைக்கக்கூடிய வேளையில், முன்னாள் ஜனாதிபதியின் ஊழியர்கள் அரசிடமிருந்து சம்பளம் மற்றும் சலுகைகளை ஏன் தொடர்ந்து அனுபவிக்கிறார்கள் என்ற கவலையும் எழுப்பப்பட்டுள்ளது.