லங்காசிறி FM
பொலன்னறுவை சிறுநீரக வைத்தியசாலை வெடிப்பு சம்பவம்; 2 பொலிஸ் குழுக்கள் நியமனம்
பொலன்னறுவை தேசிய சிறுநீரக வைத்தியசாலையின் சமையலறை வளாகத்தில் இடம்பெற்ற வெடிப்புச் சம்பவம் குறித்து ஆராய்வதற்காக 2 பொலிஸ் குழுக்கள் நியமிக்கப்பட்டு விசாரணைகள் ஆரம்பிக்கப்பட்டுள்ளன.
வைத்தியசாலையின் சமையலறை வளாகத்தில் இன்று (26) அதிகாலை 4 மணியளவில் இடம்பெற்ற இந்த வெடிப்புச் சம்பவத்தில் 7 பேர் காயமடைந்து பொலன்னறுவை பொது வைத்தியசாலையில் சிகிச்சைகளுக்காக அனுமதிக்கப்பட்டு, அவர்களில் மூவர் தீவிர சிகிச்சைப் பிரிவில் அனுமதிக்கப்பட்டுள்ளனர்.
வைத்தியசாலையில் இருந்த நோயாளர்களுக்கு பாதிப்பு இல்லை
சம்பவம் குறித்து ஆராய்வதற்காக சுகாதார அமைச்சர் நளிந்த ஜெயதிஸ்ஸவும் குறித்த வைத்தியசாலைக்கு விஜயம் செய்யவுள்ளார்.
வீடமைப்பு, நிர்மாணத்துறை மற்றும் நீர் வழங்கல் பிரதி அமைச்சர் டி.பி.சரத் என்பவரும் இச்சம்பவம் குறித்து அறிந்ததும் வைத்தியசாலைக்கு விஜயம் செய்ததுடன், ஏற்பட்ட சேதங்களை விரைவாக சீரமைக்க நடவடிக்கை எடுக்கப்படும் என்றும் தெரிவித்தார்.
இந்த வெடிப்புச் சம்பவத்தினால் வைத்தியசாலையில் இருந்த நோயாளர்களுக்கு எவ்வித பாதிப்பும் ஏற்படவில்லை என்பதையும் அவர் உறுதிப்படுத்தினார்.
வைத்தியசாலையின் பிரதான சமையலறையில் ஏற்பட்ட எரிவாயுக் கசிவு காரணமாக எரிவாயு சிலிண்டர் வெடித்திருக்கலாம் என சந்தேகிக்கப்படுவதுடன், இது தொடர்பான விசாரணைகள் தற்போது நடைபெற்று வருகின்றன.
இந்த வெடிப்புச் சம்பவத்தினால் வைத்தியசாலை நடவடிக்கைகளுக்கு இடையூறு ஏற்பட்டபோதிலும், வைத்தியசாலையின் ஒரு பகுதியில் பணிகள் தொடர்ந்தும் முன்னெடுக்கப்பட்டு வருகின்றன.
எனினும், விடுதிகளில் தங்கி சிகிச்சை பெற்று வந்த நோயாளர்களை பொலன்னறுவை பொது வைத்தியசாலைக்கு மாற்றுவதற்கு நடவடிக்கை எடுக்கப்பட்டுள்ளது. மேலும் வெடிப்பு காரணமாக அருகிலுள்ள பல கட்டிடங்களுக்கும் பலத்த சேதம் ஏற்பட்டுள்ளது.
வறுத்தலைவிளான், யாழ்ப்பாணம், கோண்டாவில், கொழும்பு, அநுராதபுரம்
25 Sep, 2022
