2027 வரவு செலவுத் திட்டத்தில் தீர்வு இல்லை: தொழிற்சங்க நடவடிக்கைக்குத் தயாராகும் அரச மருத்துவ அதிகாரிகள் சங்கம்
2027 ஆம் ஆண்டுக்கான வரவு செலவுத் திட்ட யோசனைகளின் ஊடாகத் தமது தொழிற்சங்கப் பிரச்சினைகளுக்கு எவ்விதத் தீர்வும் வழங்கப்படாமை காரணமாக, எதிர்வரும் நாட்களில் தொழிற்சங்க நடவடிக்கைகளில் ஈடுபடுவதற்கு நேற்று முன்தினம் (நவம்பர் 19) கூடிய அரச மருத்துவ அதிகாரிகள் சங்கத்தின் (GMOA) மத்திய செயற்குழு தீர்மானித்துள்ளது.
இதன்போது, மருத்துவர்களின் ஐந்து பிரதான கோரிக்கைகள் தொடர்பில் விசேட கவனம் செலுத்தப்பட்டுள்ளது. அதற்கமைய, அங்கீகரிக்கப்பட்ட முழுமையான 'டட்' (DAT) கொடுப்பனவை வழங்குதல், இடைநிறுத்தப்பட்டுள்ள மூன்றிலொரு பங்கு மேலதிக கடமை மற்றும் விடுமுறை தினக் கொடுப்பனவுகளை உடனடியாக மீள நிலைநாட்டுதல், 'டட்' கொடுப்பனவிற்கு வரி விலக்கு அளித்தல், 22/99 சுற்றறிக்கையின் கீழ் போக்குவரத்து வசதிகளுக்குத் தகுதிபெற்ற மருத்துவர்களை உள்வாங்குதல் மற்றும் வரிச் சலுகையுடனான வாகன இறக்குமதி அனுமதிப்பத்திரங்களை வழங்குதல் ஆகிய கோரிக்கைகள் இதில் உள்ளடக்கப்பட்டுள்ளன.
இந்தக் கோரிக்கைகள் தொடர்பில் மூன்று மாதங்களுக்கும் மேலாக ஆக்கபூர்வமான பேச்சுவார்த்தையைக் கோரி வந்தபோதிலும், அதிகாரிகளிடமிருந்து இதுவரை உரிய தீர்வு கிடைக்கவில்லை எனவும் அச்சங்கம் தெரிவித்துள்ளது.
ஜனாதிபதி உள்ளிட்ட அரச தரப்பிலிருந்து இது தொடர்பில் ஆக்கபூர்வமான தலையீடு மேற்கொள்ளப்படாவிடின், எதிர்வரும் நாட்களில் தொழிற்சங்க நடவடிக்கைகளை முன்னெடுக்க நேரிடும் என அரச மருத்துவ அதிகாரிகள் சங்கம் வலியுறுத்தியுள்ளது.