திலீபன் நினைவு விவகாரத்தை அரசியலாக்க வேண்டாம்

தியாகி திலீபனின் நினைவேந்தல் மற்றும் சிலை அமைப்பது தொடர்பான விவகாரத்தை அரசியலாக்காமல், அனைத்து தரப்பினரும் பொறுப்புடனும் ஒற்றுமையுடனும் செயற்பட வேண்டும் என தேசிய மக்கள் சக்தியின் யாழ்ப்பாண மாநகர சபை உறுப்பினர் சுந்தரமூர்த்தி கபிலன் தெரிவித்துள்ளார்.

யாழ்ப்பாண மாநகர சபையின் இன்றைய அமர்வில் இடம்பெற்ற விவாதத்தில் உரையாற்றிய அவர், திலீபனின் நினைவேந்தல் விவகாரத்தில் அரசியல் கட்சிகள் ஒன்றையொன்று குற்றஞ்சாட்டி வருவது வருத்தமளிப்பதாகக் குறிப்பிட்டார்.

திலீபனின் நினைவேந்தலுக்கு தமது கட்சி ஒருபோதும் எதிர்ப்பு தெரிவிக்கவில்லை எனவும், தியாகத்தின் மீதான மரியாதையின் அடிப்படையில் தமது கட்சியைச் சேர்ந்த உறுப்பினர்கள் மலரஞ்சலி செலுத்தியதாகவும் அவர் தெரிவித்தார்.

திலீபனின் சிலையை அமைப்பது தொடர்பான பிரேரணைக்கும் தமது தரப்பு எதிர்ப்பு தெரிவிக்கவில்லை எனக் குறிப்பிட்ட கபிலன், எனினும் மாநகர சபையின் நடைமுறைகள் மற்றும் சட்ட விதிமுறைகளுக்கு அமைவாகவே இவ்வாறான பிரேரணைகள் முன்வைக்கப்பட வேண்டும் என வலியுறுத்தினார்.

உணர்வுபூர்வமான இவ்வாறான விடயங்களில் உரிய கால அவகாசத்துடன் பிரேரணையை முன்வைத்து, சட்ட ஆலோசனைகளைப் பெற்று அனைத்து உறுப்பினர்களுடனும் கலந்துரையாடி ஒருமித்த முடிவை எடுக்க முடியும் எனவும் அவர் தெரிவித்தார்.

மேலும், திலீபனின் நினைவு மற்றும் சிலை தொடர்பான விடயத்தில் பொலிஸாரின் நடவடிக்கைகளை அரசியல் ரீதியாக விமர்சிப்பதைத் தவிர்த்து, சட்டவிரோதம் அல்லது அநீதி இடம்பெற்றதாக கருதப்பட்டால் உரிய சட்ட நடைமுறைகளை நாட வேண்டும் எனவும் அவர் கேட்டுக்கொண்டார்.

திலீபனின் தியாகத்தை அரசியல் நோக்கங்களுக்காக பயன்படுத்தாமல், அவரது நினைவை மதிக்கும் வகையில் அனைத்து தரப்பினரும் பொறுப்புடனும் ஒற்றுமையுடனும் செயற்பட வேண்டும் என்பதே தமது நிலைப்பாடு எனவும் சுந்தரமூர்த்தி கபிலன் தெரிவித்துள்ளார்.