மதுபோதையில் இ.போ.ச பேருந்து செலுத்தியவருக்கு வாழ்நாள் தடை!
மதுபோதையில் பேருந்தை ஓட்டியதாகக் குற்றம் சாட்டப்பட்ட, இலங்கை போக்குவரத்து சபையைச் சேர்ந்த 58 வயதுடைய பேருந்து சாரதி ஒருவரின் சாரதி அனுமதிப்பத்திரம் வாழ்நாள் முழுவதும் செல்லாததாக்கப்பட்டுள்ளது.
காவல்துறையினரின் தகவல்படி, கொழும்பிலிருந்து குருநாகல் நோக்கிச் செல்லும் 05-ஆம் இலக்க வழித்தடப் பேருந்தை குறித்த சாரதி இயக்கிச் சென்றபோது, வியாழக்கிழமை (19) சங்கராஜ மாவத்தையில் வைத்து, மருதானை காவல் நிலையத்தைச் சேர்ந்த போக்குவரத்துப் பொலிஸார் சோதனையிடநிறுத்த முயன்றனர்.

எனினும் , பொலிஸாரின் அறிவுறுத்தலைப் புறக்கணித்துவிட்டு அவர் பேருந்தை தொடர்ந்து ஓட்டிச் சென்றதையடுத்து, பொலிஸார் பேருந்தைப் பின்தொடர்ந்து சென்று தடுத்து நிறுத்தினர்.
சாரதி கைது செய்யப்பட்டு, மேற்கொள்ளப்பட்ட மேலதிக பரிசோதனைகளில் அவர் மது அருந்தியிருந்தது உறுதிப்படுத்தப்பட்டது. நாரம்மலையைச் சேர்ந்த 58 வயதான இந்த நபர், புதுக்கடை நீதவான் நீதிமன்ற இலக்கம் 07-இல் முன்னிலைப்படுத்தப்பட்டார்.
இதன்போது, நீதிமன்றம் அவருக்கு 35,000 ரூபா அபராதம் விதித்ததுடன், அவரது சாரதி அனுமதிப்பத்திரத்தை வாழ்நாள் முழுவதும் ரத்து செய்யவும் உத்தரவிட்ட நிலையில் நீதிமன்றத் தீர்ப்பை, வியாழக்கிழமை இரவு பொலிஸ் ஊடகப் பிரிவு வெளியிட்ட அறிக்கை ஒன்றின் மூலம் உறுதிப்படுத்தியது.