நாட்டில் சீரற்ற வானிலையால் ஏற்பட்டுள்ள பாதிப்புகள்

நேற்று (26) இரவு மழையுடன் ஏற்பட்ட பலத்த காற்று காரணமாக கொழும்பு உட்பட பல பகுதிகளில் மரங்கள் முறிந்து விழுந்துள்ள அதே நேரத்தில் நுவரெலியா மாவட்டத்தில் பல இடங்களில் மண்மேடுகள் சரிந்துள்ளன.

தென்மேற்கு பருவமழை தீவிரமடைந்துள்ளதால், கடந்த சில நாட்களாக நாட்டின் பல பகுதிகளில் மழை பெய்து வருகிறது.

யாழில் கடவுச்சீட்டு அலுவலகத்தை பார்வையிட்ட கடற்றொழில் அமைச்சர்

இன்று (27) காலை முதல் கொழும்பு மற்றும் அதன் புறநகர்ப் பகுதிகளில் அவ்வப்போது மழை பெய்து வருகிறது. நேற்று இரவு பெய்த மழையுடன் கூடிய பலத்த காற்று காரணமாக களனிமுல்ல பகுதியில் பல மரங்கள் முறிந்து விழுந்ததில், அப்பகுதியில் பல மின் கம்பங்கள் சேதமடைந்தன.

கொழும்பின் ஹுனுபிட்டியவில் உள்ள கங்காராம விகாரைக்கு அருகிலுள்ள மரம் ஒன்று இரண்டு கார்கள் மீது விழுந்து சேதம் ஏற்பட்டுள்ளது.

நேற்று இரவு கொழும்பு நகரில் வீசிய பலத்த காற்றினால் கொழும்பு பல்கலைக்கழகத்தில் உள்ள திறந்த மற்றும் தொலைதூரக் கல்வி மத்திய நிலையத்தின் கூரையும் சேதமடைந்தது.

சிலாபம், வெல்ல கிராமத்தில் பலத்த காற்று வீசியதால் ஆறு வீடுகள் சேதமடைந்துள்ளன.

நேற்று மாலை முதல் இன்று காலை வரை பலத்த காற்று வீசியதால், அப்பகுதி மீனவர்களும் கடலுக்குச் செல்வதைத் தவிர்த்து வருகின்றனர். மேலும், இன்று அதிகாலை 5.00 மணியளவில் பலத்த காற்று காரணமாக ஓஹியா ரயில் நிலையத்திற்கு அருகிலுள்ள ஹோட்டந்தென்ன வீதியில் பெரிய மரம் ஒன்று முறிந்து விழுந்தது.

ஓஹிய ரயில் நிலையத்திற்குப் பின்னால் உள்ள ஹோடந்தென்ன வீதியில் முன்னர் நிலச்சரிவால் பாதிக்கப்பட்ட பகுதியில் பாதுகாப்பு சுவர் கட்டப்பட்டு வந்த இடத்திற்கு மேலே இருந்த மரமே இவ்வாறு விழுந்துள்ளது.

மரம் விழுந்ததில், அந்த இடத்தில் நிறுத்தப்பட்டிருந்த கட்டுமான நிறுவனத்திற்குச் சொந்தமான உபகாரணங்களுக்கும் மற்றும் ஓஹிய ரயில் நிலையத்தின் கூரைக்கும் சேதம் ஏற்பட்டுள்ளது.

நுவரெலியா மாவட்டத்தில் கடந்த சில நாட்களாக பெய்து வரும் பலத்த மழையால், மதுரட்ட, மந்தாரநுவர, பதியபெல்ல போன்ற பகுதிகளில் பல இடங்களில் மண்மேடுகள் சரிந்துள்ளன.

இதற்கிடையில், அனுராதபுரத்தில் உள்ள திசா குளத்தின் கரையில் இன்று நிறுத்தப்பட்டிருந்த முச்சக்கர வண்டியொன்று, அப்பகுதியில் வீசிய பலத்த காற்றால் விபத்திற்குள்ளானது.

முச்சக்கர வண்டியின் உரிமையாளர் குளித்துக் கொண்டிருந்தபோது, ​​வாகனம் பலத்த காற்றில் அடித்துச் செல்லப்பட்டு குளத்தில் விழுந்ததாகக் கூறினார். பின்னர், பொலிஸ் உயிர்காப்பாளர்களும் பிரதேசவாசிகளும் இணைந்து முச்சக்கர வண்டியை மீட்டனர்.

இலங்கையின் தென்மேற்குப் பகுதி, மேற்கு கடல் பகுதிகள் மற்றும் மத்திய வங்காள விரிகுடாவில் மேகங்கள் உருவாகி வருவதாக வளிமண்டலவியல் திணைக்களம் தெரிவித்துள்ளது.

இதன் காரணமாக, மேல் மற்றும் சப்ரகமுவ மாகாணங்களிலும், காலி, மாத்தறை, கண்டி மற்றும் நுவரெலியா மாவட்டங்களிலும் தற்போது நிலவும் மழையுடனான வானிலை, வரும் நாட்களில் அதிகரிக்கும் வாய்ப்பு உள்ளது.

தற்போது மழைக்காலம் தொடங்கிவிட்டதால் நுளம்பங்களின் பரவல் அதிகரித்து வருவதால், டெங்கு மற்றும் சிக்குன்குனியா நோய்களிலிருந்து பொதுமக்கள் தங்களைப் பாதுகாத்துக் கொள்ள நடவடிக்கை எடுக்க வேண்டும் என்று சுகாதார அதிகாரிகள் வலியுறுத்துகின்றனர்.

லக்னோவை வீழ்த்தி 2ஆவது இடத்திற்கு முன்னேறிய பெங்களூர் அணி