லங்காசிறி FM
ஹோமகம பல்கலைக்கழக மாணவரின் மரணம்; திடுக்கிடும் தகவல்
ஹோமாகம பகுதியில் உள்ள விருந்தகம் ஒன்றில் தனியார் பல்கலைக்கழக மாணவர்கள் குழுவினர் நடத்திய விருந்துபசாரத்தின் போது ஏற்பட்ட மோதலில் மாணவர் உயிரிழந்த சம்பவம் தொடர்பில் விசாரணைகளில் பல தகவல்கள் வெளியாகியுள்ளன.
தாக்குதலால் ஏற்பட்ட உயிருக்கு ஆபத்தான காயங்கள் எதுவும் உடலில் இல்லை என்று அறிக்கையில் கூறப்பட்டதை அடுத்து , மேலதிக விசாரணைக்காக உடலம் பிரேத பரிசோதனைக்காக அதிகாரியிடம் ஒப்படைக்கப்பட்டுள்ளதாக பொலிஸார் கூறியுள்ளனர்.
உடலம் பிரேத பரிசோதனைக்காக...
புத்தாண்டு கொண்டாட்டத்தைத் தொடர்ந்து, அந்தப் பல்கலைக்கழகத்தைச் சேர்ந்த மாணவர்கள் குழு ஒன்று சம்பந்தப்பட்ட விழா மண்டபத்திற்கு வந்து விருந்து நடத்தியதாகத் தெரிவிக்கப்பட்டுள்ளது.
விருந்தின் போது ஏற்பட்ட வாக்குவாதம், இரண்டு மாணவர் குழுக்களுக்கு இடையே மோதலாக மாறியதில் ஒரு மாணவர் அங்கேயே உயிரிழந்தார்.
மோதலின் போது நடந்த தாக்குதலே மரணத்திற்குக் காரணம் என ஆரம்பகட்ட விசாரணைகள் தெரிவித்தபோதிலும், அந்த மரணம் தாக்குதலால்தான் ஏற்பட்டது என்பதை மேலதிக விசாரணைகள் திட்டவட்டமாக உறுதிப்படுத்தவில்லை என காவல்துறை தெரிவித்துள்ளது.
சம்பவ இடத்தில் இருந்த சிசிடிவி மெமராக்களை ஆய்வு செய்தபோதும், கைது செய்யப்பட்ட மாணவர்களிடம் விசாரணை நடத்தியபோதும் வேறு பல உண்மைகள் தெரியவந்ததாக காவல்துறை கூறியது.
அதன்படி, விருந்தின்போது அந்த இடத்தில் இருந்த பல மாணவிகள் கழிவறைக்குச் சென்றிருந்தனர், அவர்களைத் தொடர்ந்து மற்றொரு மாணவியும் சென்றிருந்ததாக தெரிவிக்கப்படுகிறது.
குறித்த மாணவிகள் வந்து சேரத் தாமதமானதால், வேறு பல மாணவர்கள் சம்பவ இடத்திற்குச் சென்றிருந்தனர், அப்போதுதான் மோதல் வெடித்ததாக காவல்துறை தெரிவித்துள்ளது.
சம்பவ இடத்தில் உள்ள நீச்சல் குளத்திற்கு அருகே உயிரிழந்த மாணவர் கீழே விழுவது சிசிடிவி காட்சிகளில் பதிவாகியுள்ளதாக காவல்துறை தெரிவித்துள்ளது. உயிரிழந்தவர், ஹிரிப்பிட்டிய, நிக்கடலுபோத்தவைச் சேர்ந்த யசித் சத்துக்க என்ற 19 வயது மாணவர் ஆவார்,
இதற்கிடையில், மோதலில் காயமடைந்த மற்றொரு மாணவர் தற்போது மருத்துவமனையில் சிகிச்சை பெற்று வருகிறார். இந்நிலையில் மாணவனின் மரணம் பெறும் துயரத்தை ஏற்படுத்தியுள்ளது.
