2027ஆம் ஆண்டுக்கான எரிவாயு விநியோக ஒப்பந்தம்; அமைச்சரவை அனுமதி

Sri Lanka Cabinet Litro Gas Cabinet Decisions

By Sulokshi Oct 13, 2026 03:00 PM GMT

Sulokshi

Report

2027ஆம் ஆண்டுக்கான திரவ பெற்றோலிய வாயுவை (LPG) விநியோகிப்பதற்கான ஒப்பந்தத்தை சவூதி அரம்கோ நிறுவனத்துக்கு வழங்க அமைச்சரவை அங்கீகாரம் வழங்கியுள்ளது.

அதற்கமைய, 2027 ஜனவரி முதலாம் திகதி முதல் 12 மாத காலத்திற்கு 420,000 மெற்றிக் தொன் (±20%) எரிவாயுவை விநியோகிப்பதற்கான ஒப்பந்தம் வழங்கப்படவுள்ளது.

2027ஆம் ஆண்டுக்கான எரிவாயு விநியோக ஒப்பந்தம்; அமைச்சரவை அனுமதி | Cabinet Approval For The 2027 Gas Supply Agreement

விலைமனுதாரராகத் தெரிவு செய்யப்பட்ட சவூதி அரம்கோ நிறுவனம்

இதன் குறைந்தபட்ச உறுதிப்படுத்தப்பட்ட அளவு 336,000 மெற்றிக் தொன்னாகும். குறித்த விநியோகத்திற்காக சர்வதேச போட்டி விலைமுறையின் கீழ் கோரப்பட்ட விலைமனுக்களில் நான்கு விலைமனுக்கள் கிடைக்கப்பெற்றுள்ளன.

அவற்றை மதிப்பீடு செய்த பின்னர், உயர்மட்ட பெறுகைக் குழுவின் பரிந்துரைக்கு அமைய, கணிசமான பதிலளிப்புத் தகைமைகளைக் கொண்ட குறைந்த விலைமனுதாரராகத் தெரிவு செய்யப்பட்ட சவூதி அரம்கோ நிறுவனத்துக்கு ஒப்பந்தத்தை வழங்கத் தீர்மானிக்கப்பட்டுள்ளது.

இதன்படி, காப்புறுதி மற்றும் கப்பல் போக்குவரத்துக் கட்டணங்கள் உள்ளடங்கலாக, ஒரு மெற்றிக் தொன்னுக்கு 133.93 அமெரிக்க டொலர் என்ற ஒப்பந்த விலையில் எரிவாயு விநியோகிக்கப்படவுள்ளது.

இது தொடர்பான யோசனையை நிதி, திட்டமிடல் மற்றும் பொருளாதார அபிவிருத்தி அமைச்சரான ஜனாதிபதி அமைச்சரவையில் சமர்ப்பித்ததையடுத்து, அதற்கு அமைச்சரவை அங்கீகாரம் வழங்கியுள்ளமை குறிப்பிடத்தக்கது.