இயற்கையின் அற்புதம் பனங்கிழங்கு! எவ்வளவு சத்துக்கள் தெரியுமா?
இயற்கையோடு இயைந்து வாழ்ந்தால், ஆரோக்கியத்திற்கு என்றென்றும் சிக்கலே எழாது என நம்முன்னோர்கள் கூறியுள்ளார்கள்.
அதற்கு உதாரணமாக இருக்கும் உணவுப் பொருட்களில் ஒன்றுதான் பனங்கிழங்கு (Palmyra sprout). பூமியின் கற்பக விருட்சம் என்று சொல்லப்படும் பனை மரம், நீண்ட காலம் உயிர்வாழ்வது. பனையில் இருந்து கிடைக்கும் ஒவ்வொருப் பொருளும் மனிதர்களுக்கு மிகவும் நன்மைத் தருபவை.
அதுமட்டுமல்லாது பனை மரத்தின் அனைத்துப் பொருட்களுக்கும் மருத்துவ குணங்கள் உண்டு என்பது அதிசயமான விஷயம்.
பனங்கிழங்கின் ஆரோக்கிய நன்மைகள்
பொதுவாக மண்ணுக்கு அடியில் இருந்து எடுக்கப்படும் கிழங்கு வகைகளை, நீரிழிவு நோயாளிகள் சாப்பிடுவதை தவிர்க்க வேண்டும் என்று சொல்வார்கள். ஆனால், பனங்கிழங்குக்கு மட்டும் அதற்கு விலக்கு.
ஏனெனில், பனங்கிழங்கில் உள்ள குறிப்பிட்ட வகை வேதிப்பொருட்கள், உடலின் இன்சுலின் உற்பத்தியை ஊக்குவிக்கிறது. எனவே, பனங்கிழங்கால் நீரிழிவு நோயாளிகளுக்கு எந்தவித ஆபத்தும் இல்லை.
பனங்கிழங்கில் இரும்புச் சத்து அதிகமாக இருப்பதால், ரத்த விருத்திக்காக பனங்கிழங்கு பரிந்துரைக்கப்படுகிறது.
தொடர்ந்து பனங்கிழங்கை உணவில் சேர்த்து வந்தால், ரத்தசோகை நோய் உள்ளவர்களுக்கு பிரச்சனைகள் தீரும். நோய் எதிர்ப்பு சக்தியும் அதிகரிக்கும்.
பனங்கிழங்கில் அதிக அளவிலான நார்ச்சத்து(Fibre Benefits) இருப்பதால், மலச்சிக்கல்களை தூர விரட்டி, வயிற்றை சுத்தமாக வைத்துக் கொள்ளும்.
பனங்கிழங்கில் பாதமைப் போன்ற உயர்சத்துக்கள் உள்ளன. அதனால்தான், பணககாரனுக்கு பாதாம், பசித்தவனுக்கு பனங்கிழங்கு என்ற சொல்லடை நம் முன்னோர் காலத்தில் இருந்து சொல்வதுண்டு.
கவனத்தில் கொள்ளவேண்டியவை
உடல் மெலிந்தவர்களுக்கு, சுலபமாக எடையை ஏற்றுவதற்கும் பனங்கிழங்கு சிறந்தது என்பதால், உடல் பருமனானவர்கள் அளவுடன் தான் பனையின் கிழங்கை சாப்பிட வேண்டும்.
அதேபோல, பனங்கிழங்கு உடலுக்கு குளுமையைத் தரக்கூடியது என்பதால், குளிர்ச்சியான உடல் உடையவர்கள் பனங்கிழங்கை அதிகம் பயன்படுத்த வேண்டாம் என பரிந்துரைக்கப்படுகின்றது.
பனங்கிழங்கை சாப்பிட்டால் சிலருக்கு வாயுத்தொல்லை அதிகமாகலாம். எனவே, பனங்கிழங்குடன் பூண்டு சேர்த்து சமைத்தால் வாயுத்தொல்லை இருக்காது.
அதேசமயம் ஆரோக்கியமான உடலைப் பெற, பனங்கிழங்கை சமைக்கும்போது, அதில் மிளகு சேர்த்துக் கொள்ள வேண்டும். இல்லாவிட்ட்டால், உடல் பித்தம் அதிகரிக்கும்..